Greiðslu­kröf­urnar sem sendar voru út í morgun frá Flótta­manna­hjálp Íslands, áhuga­manna­fé­lagi upp á 990 krónur hver voru sendar fyrir mis­tök af hálfu áhuga­manna­fé­lags­ins. Alls voru 62.080 greiðslu­kröfur sendar úr úti­búi Lands­bank­ans í heima­banka við­skipta­vina við­skipta­bank­anna þriggja og þær merktar „Fé­lags­gjöld“.

Kjarn­inn sagði frá því í dag að fjöl­margir hefðu fengið slíkar kröfur en eng­inn sem rit­stjórn Kjarn­ans ræddi við kann­að­ist nokkuð við að hafa óskað eftir að aðild að áhuga­manna­fé­lag­inu. Í fyr­ir­tækja­skrá segir um Flótta­manna­hjálp Íslands - áhuga­manna­fé­lag að til­gangur þess sé „Al­þjóð­legt hjálp­ar­starf á Íslandi í Mala­ví, Sierra Leo­ne, Palest­ínu, Ken­ía, Haítí og í Hvíta-Rúss­landi auk þess sem félagið veitir neyð­ar­að­stoð í kjöl­far ham­fara hvar sem er í heim­inum þegar kemur að vatns skorti sem er á við neyð. Börn munu ávallt vera í for­gangi í okkar hjálp, flótta­fólk í neyð.“

Sam­kvæmt upp­lýs­ingum frá Lands­bank­anum voru aðeins örfáir búnir að borga kröf­urn­ar, eða um 30 manns. Búið er að fá leyfi frá félag­inu til að bak­færa greiðsl­urnar og ætlar bank­inn að sjá til þess að þeir sem greiddu verði upp­lýstir um mál­ið. Um leið og bank­inn frétti af þessu hafi verið farið í að leið­rétta mis­tök­in.

Ekki hefur náðst í for­svars­mann áhuga­manna­fé­lags­ins þrátt fyrir ítrek­aðar til­raun­ir.

Flótta­manna­hjálp Íslands, áhuga­manna­fé­lag var stofnað í jan­úar 2014. Hvorki UNICEF né Rauði kross Íslands hafa nokkru sinni heyrt um þetta félag. Bók­halds­deild Rauða kross­ins hefur borist mörg sím­töl í dag þar sem spurt er hvort greiðslu­krafan sé á vegum Rauða kross­ins. Í kjöl­far þess að Kjarn­inn hafði sam­band birt­ust til­kynn­ingar á sam­fé­lags­miðlum Rauða kross­ins um að þessar kröfur beri að var­ast.