Greiðslur til allra bankastjóra stærstu bankanna jukust í fyrra

Bankastjóri Íslandsbanka fékk sérstaka yfirvinnugreiðslu vegna undirbúnings fyrir skráningu á markað. Bankastjóri Arion banka fékk myndarlega bónusgreiðslu. Bankastjóri Landsbankans fékk hefðbundna launahækkun.

Þórður Snær Júlíusson 11. febrúar 2022

Bankastjórar þriggja stærstu banka landsins.

Birna Einarsdóttir, bankastjóri Íslandsbanka, fékk samtals 68,6 milljónir króna í laun og mótframlag í lífeyrissjóð í fyrra, eða 5,7 milljónir króna að meðaltali á mánuði. Á árinu 2020 fékk hún 60,3 milljónir króna í laun eða um fimm milljónir króna á mánuði.

Munurinn á launum milli ára skýrist af sérstakri 10,9 milljón króna greiðslu vegna yfirvinnu sem Birna fékk í tengslum við undirbúning hlutafjárútboðs og skráningar Íslandsbanka á markað í fyrrasumar. Án hennar hefðu hefðu heildarlaun Birnu lækkað um 2,6 milljónir króna milli ára.

Þetta kemur fram í ársreikningi Íslandsbanka sem birtur var í gær. Íslenska ríkið er stærsti eigandi bankans með 65 prósent eignarhlut.

Fékk bónusgreiðslu

Allir bankastjórar stóru bankanna fengu hærri greiðslur frá atvinnurekanda sínum í fyrra en á árinu 2020. Benedikt Gíslason, bankastjóri Arion banka, var með 69,8 milljónir króna í laun og mótframlag í lífeyrissjóð í fyrra, eða 5,8 milljónir króna að meðaltali á mánuði. Arion banki hefur hins vegar innleitt kaupauka- og kaupréttarkerfi sem umbunar starfsfólki umtalsvert.

Kaupaukakerfið gengur meðal annars þannig fyrir sig að ef bankinn nær því markmiði að vera með meiri arðsemi en helstu samkeppnisaðilar sínar þá fá stjórnendur og það starfsfólk sem hefur hvað mest áhrif á tekjur og kostnað bankans allt að 25 prósent af föstum árslaunum í kaupaukagreiðslu, en í formi hlutabréfa í bankanum sem verða ekki laus til ráðstöfunar fyrr en að þremur árum liðnum. Í tilfelli Benedikts þýðir það kaupauka upp á 17,5 milljónir króna en hann var með 69,8 milljónir króna í laun og mótframlag í lífeyrissjóð á síðasta ári.

Samkvæmt kaupréttaráætlun Arion banka geta allir fastráðnir starfsmenn keypt hlutabréf í bankanum fyrir 1,5 milljón króna einu sinni ári í fimm ár. Þau kaup fara fram á genginu 95,5 krónur, en markaðsvirði Arion banka er 98 prósent yfir því gengi í dag. Það þýðir að bréfin sem starfsmaður kaupir á 1,5 milljónir króna eru þriggja milljón króna virði.

Arion banki er eini kerfislega mikilvægi bankinn sem íslenska ríkið á ekki hlut í. Stærstu eigendur bankans eru íslenskir lífeyrissjóðir.

Með 4,5 milljónir á mánuði

Laun Lilju Bjarkar Einarsdóttur, bankastjóra Landsbankans, hækkuðu um 3,2 milljónir króna í fyrra og voru 45,4 milljónir króna. Það þýðir að hún var með 3,8 milljónir króna í mánaðarlaun að meðaltali sem er um 263 þúsund krónum hærri laun á mánuði en hún hafði að meðaltali á mánuði á árinu 2020. Laun hennar hækkuðu því um sjö prósent milli ára.

Auk launa og hlunninda (sem í felast til að mynda afnot af bifreið í eigu bankans) fékk Lilja greitt mótframlag í lífeyrissjóð upp á 8,7 milljónir króna, eða 725 þúsund krónur á mánuði að meðaltali. Mótframlagsgreiðslur hennar hækkuðu um 8,8 prósent milli ára.

Samtals fékk Lilja því 54,4 milljónir króna í laun og mótframlag í lífeyrissjóðs á síðasta ári, eða rúmlega 4,5 milljónir króna á mánuði.

Landsbankinn er í eigu íslenska ríkisins.

Allir stóru bankarnir þrír hafa nú birt ársreikninga sína vegna ársins 2021. Samanlagður hagnaður þeirra á því ári var 81,2 milljarðar króna. Á árinu 2020 högnuðust þeir um tæpa 30 milljarða króna. Því var hagnaður þeirra á síðasta ári 170 prósent meiri en á árinu 2020.