Það kennir ýmissa grasa í hlaðvarpsþættinum Bókahúsinu sem Sverrir Norland stýrir. Í níunda þætti er rætt við Ólínu Kjerúlf Þorvarðardóttur sem gaf á dögunum út hina hugljúfu minningasögu Ilmreyr.
Bókin Ilmreyr er kveðja frá dóttur til móður en um leið óður til formæðra og -feðra sem háðu lífsbaráttu vestur á fjörðum.
Hólmfríður Matthíasdóttir, oft kölluð Úa, er einnig til viðtals en hún er útgáfustjóri Forlagsins og hugar vakin og sofin að því að ilmandi nýjar bækur rati til landsmanna.
![Gunnar Theodór Eggertsson](http://kjarninn.overcastcdn.com/images/GunnarTheodorEggertsson_Gassi_2017_SV.width-500.jpg)
Gunnar Theódór Eggertsson sem skrifað hefur fyrsta bindið í Furðufjalli, skemmtilegri ævintýrasögu fyrir krakka, ræðir um barnabókmenntir í þættinum, en bók hans nefnist Nornaseiður. Gunnar hlaut Íslensku barnabókaverðlaunin 2008 fyrir fyrstu barnabók sína, Steindýrin, og var tilnefndur til Íslensku bókmenntaverðlaunanna árið 2015 fyrir Drauga-Dísu.
Bókahúsið er hlaðvarp Forlagsins og þættina má nálgast á öllum helstu hlaðvarpsveitum.
Í Bókahúsinu er rætt við höfunda en einnig aðra sem með einhverjum hætti koma að bókaútgáfu. Þættirnir hófu göngu sína nú í haust og hefur þáttastjórnandi farið um víðan völl í heimi bókmennta og bókaútgáfu.
Á dögunum var rætt við Þorgrím Þráinsson sem miðlar sinni hvetjandi og jákvæðu lífsspeki í bókinni Verum ástfangin af lífinu og sendir einnig frá sér ungmennabókina Tunglið, tunglið taktu mig nú í haust.
![Þórarinn og Sigrún Eldjárn.](http://kjarninn.overcastcdn.com/images/eldjarn.width-500.jpg)
Þá hefur Sverrir einnig rætt við systkinin Sigrúnu Eldjárn og Þórarin Eldjárn en þau sendu frá sér myndskreytta ljóðabók, Rím og Roms fyrr á árinu, auk þess Sigrún á svo barnabókina Rauð viðvörun í jólabókaflóðinu og Þórarinn smásagnasafnið Umfjöllun. Þáttinn með viðtali við systkinin Eldjárn og Þorgrím Þráinsosn má finna hér að neðan.
Allir þættir Bókahússins eru aðgengilegir á vef Forlagsins.