Fjármálaráðuneyti Noregs hefur ákveðið að skipa Jens Stoltenberg, framkvæmdastjóra NATO og fyrrum forsætisráðherra landsins, sem nýjan seðlabankastjóra. Þetta kemur fram í frétt á vef NRK.
Samkvæmt fréttinni hefur stjórnarandstaðan í landinu og ýmsir hagfræðingar varað við skipun Stoltenberg, þar sem stjórnmálatengsl hans gætu vegið að sjálfstæði Seðlabanka Noregs.
Stoltenberg er fyrsti skipaði seðlabankastjórinn í landinu sem hefur bein tengsl við stjórnmálaflokk frá því á tíunda áratugnum, en líkt og hérlendis hefur fjármálaráðuneyti Noregs veigrað sér við pólitískum skipunum í embættið.
Fjármálaráðherra Noregs, Trygve Slagsvold Vedum, segist hins vegar vera öruggur með að Stoltenberg, sem er menntaður þjóðhagfræðingur, sé hæfasti maðurinn í starfið sökum fyrri reynslu hans. Fjármálaráðuneytið hefur einnig lýst því yfir að stjórnmálatengsl hans muni ekki vega að sjálfstæði Seðlabankans, þar sem það séu meira en átta ár síðan hann var forsætisráðherra.
Jens Stoltenberg sat í ríkisstjórn Noregs í 19 ár, fyrst frá árinu 1990 til árið 2001 og svo frá árinu 2005 til 2013. Þar var hann fyrst umhverfis- og orkuráðherra, síðan fjármálaráðherra og svo forsætisráðherra. Árið 2014 var hann svo skipaður framkvæmdastjóri Atlantshafsbandalagsins (NATO) og hefur hann gegnt því embætti síðan þá. Áður en hann tók þátt í stjórnmálum starfaði hann sem blaðamaður og hagfræðingur og var meðal annars framkvæmdastjóri norsku hagstofunnar.
Samkvæmt Stoltenberg mun hann halda áfram sem framkvæmdastjóri NATO þangað til 1. október, en mun svo taka við sem seðlabankastjóri í kringum desemberbyrjun. Varaseðlabankastjóri landsins, Ida Wolden Bache, mun gegna stöðu seðlabankastjóra þangað til.
