„Kynin sam­kvæmt lögum eru ekki lengur tvö, kona og karl, heldur opnar skil­grein­ingin á hug­tak­inu í lögum á þann mögu­leika að kyn séu fleiri.“

Þetta kemur fram í svari Katrínar Jak­obs­dóttur for­sæt­is­ráð­herra við fyr­ir­spurn frá Sig­mundi Davíð Gunn­laugs­syni for­manni Mið­flokks­ins um kyn. Hann spurði hversu mörg kyn mann­fólks væru, að mati ráðu­neyt­is­ins.

Í svar­inu er bent á að í lögum um kyn­rænt sjálf­ræði sé kveðið á um óskor­aðan rétt ein­stak­linga til að skil­greina kyn sitt.

Skil­grein­ing kyns ræðst ekki ein­göngu af líf­fræði

„Sam­kvæmt sömu lögum er hlut­laus skrán­ing kyns heimil og ber aðilum sem skrá­setja kyn að gera ráð fyrir því að ein­stak­lingar geti skráð kyn sitt með þrennum hætti, kona, karl og kyn­hlut­laus. Hug­takið kyn er skil­greint í fram­an­greindum lögum sem „safn­hug­tak sem nær meðal ann­ars yfir kynein­kenni, kyn­gervi, kyn­vit­und og kyntján­ing­u“. Skil­grein­ing kyns ræðst því ekki ein­göngu af líf­fræði.

Sam­kvæmt fram­an­sögðu er opin­ber skrán­ing kyns sam­kvæmt lögum nú þrenns konar og opnar hlut­laus skrán­ing kyns á þann mögu­leika að ein­stak­lingur sem telur sig ekki falla undir hefð­bundna flokkun í konu eða karl geti nú skil­greint sig sem kyn­hlut­lausan sam­kvæmt opin­berum gögn­um,“ segir í svar­inu.

Þá kemur enn fremur fram hjá ráð­herra að frá 6. jan­úar 2021 hafi verið hægt að óska eftir hlut­lausri skrán­ingu kyns í þjóð­skrá. Í sam­vinnu við Sam­tökin ’78 hafi Þjóð­skrá Íslands ákveðið að ein­stak­lingar sem óska eftir hlut­lausri skrán­ingu kyns í þjóð­skrá skyldu skráðir „kynseg­in/ann­að“. Talið sé að um þetta heiti megi ná sem mestri sátt innan hinsegin sam­fé­lags­ins og að flestir ein­stak­lingar geti sam­samað sig því.