Búið er að hand­taka níu manns í tengslum við hryðju­verkin í Túnis í gær. Fjórir eru sagðir hafa tekið þátt í hryðju­verk­unum og fimm hafa tengsl við hryðju­verka­sell­una sem fram­kvæmdi árás­ina.

Að minnsta kosti 23 hafa látið lífið vegna skotárás­ar­innar sem var gerð á Bardo þjóð­minja­safnið í Tún­is, höf­uð­borg Tún­is, í gær. Tutt­ugu erlendir ferða­menn eru meðal hinna látnu. Lög­reglan skaut tvo árás­ar­menn til bana á staðnum í gær eftir að þeir höfðu haldið fólki í gísl­ingu í safn­inu í nokkrar klukku­stund­ir. Greint hefur verið frá því að annar mann­anna hafi verið þekktur hjá lög­regl­unni. Hann hét Yassine Laabidi og hinn mað­ur­inn sem var drep­inn hét Hatem Khachna­oui.

Breska rík­is­út­varpið BBC greinir frá því að Al-Kaída hryðju­verka­sam­tökin hafi sagt að árása­renn­irnir tveir hafi dvalið með íslömskum öfga­mönnum í þjálf­un­ar­búðum í Líb­íu. Þá hefur einnig verið sagt frá því að menn­irnir hafi upp­haf­lega ætlað að ráð­ast á þing­húsið í Tún­is, sem er skammt frá safn­inu. Þeir hafi hins vegar hörfað þaðan vegna mik­illar örygg­is­gæslu lög­reglu­manna.

Fyrr í dag fund­ust þrír ein­stak­lingar á lífi inni í safn­inu, tveir spænskir ferða­menn og einn starfs­maður safns­ins. Þau höfðu falið sig í safn­inu og ekki þorað að hreyfa sig af ótta við að árásinni væri ekki lok­ið.