Sam­herji fisk­eldi ehf. hefur gert samn­inga við HS Orku um upp­bygg­ingu lax­eldis á landi í Auð­linda­garð­inum við Reykja­nes­virkj­un. Fyr­ir­huguð heild­ar­fjár­fest­ing í verk­efn­inu nemur 45 millj­örðum króna, sam­kvæmt til­kynn­ingu á vef Sam­herja, en þar segir einnig að stjórn félags­ins hafi þegar ákveðið að leggja 7,5 millj­arða í fyrsta áfanga þess.

Á vef Sam­herja segir að félagið hafi tryggt sér aðgang að sjó og raf­orku til að fram­leiða allt að 40 þús­und tonn af laxi á landi árlega og samið við land­eig­endur vegna upp­bygg­ing­ar­inn­ar. Kynn­ing­ar­fundur fer fram um verk­efnið í Hljóma­höll­inni í Reykja­nesbæ á morg­un.

Upp­bygg­ingin á að verða í þremur áföng­um, á næstu 11 árum, sam­kvæmt til­kynn­ingu Sam­herja, þar sem segir að ráð­gert sé að leita til fleiri fjár­festa þegar kemur að frek­ari stækkun land­eld­is­ins.

„Land­eld­is­á­formin í Auð­linda­garð­inum telj­ast stór í sam­an­burði við önnur land­eld­is­verk­efni sem nú eru í und­ir­bún­ingi á alþjóða­vísu. Fjöl­mörg störf verða til á fram­kvæmda­tím­anum og á annað hund­rað störf við land­eldið þegar vinnsla á afurðum hefst,“ segir í til­kynn­ingu Sam­herja.

Sam­kvæmt áætl­unum Sam­herja fisk­eldis mun seiða­eldi við fyrsta áfanga hefj­ast í upp­hafi árs 2023 og áframeldi og vinnsla á afurðum á árunum 2024 og 2025. Í fyrsta áfanga á fram­leiðslan að verða 10.000 tonn af laxi og áætluð fjár­fest­ing upp á 17 millj­arða króna. Í öðrum áfanga verður bætt við 10.000 tonnum og í þriðja áfanga 20.000 tonn­um.

Ef allt gengur að óskum verður land­eldið í Auð­linda­garð­inum komið í full afköst á árinu 2032, sam­kvæmt til­kynn­ingu fyr­ir­tæk­is­ins.