Meg­in­vextir Seðla­banka Íslands munu hækka um 0,25 pró­sentu­stig og verða 1 pró­sent, sam­kvæmt nýrri til­kynn­ingu pen­inga­stefnu­nefndar bank­ans.

Þetta er í fyrsta skipti frá árinu 2018 sem nefndin hefur ákveðið að hækka vexti. Síðan þá hafa þeir ýmist lækkað eða staðið í stað, úr 4,5 pró­sentum niður í 0,75 pró­sent.

Sam­kvæmt nefnd­inni hafa efna­hags­horfur batnað frá fyrri spám og vega þar þyngst vís­bend­ingar um meiri bata inn­lendrar eft­ir­spurn­ar. Atvinnu­leysi hefur hjaðnað þótt það sé enn mik­ið. Slak­inn í þjóð­ar­bú­skapnum virð­ist því vera minni og útlit er fyrir að hann hverfi fyrr en áður var talið.

Hins vegar hefur verð­bólga reynst meiri og þrá­lát­ari en áður var spáð, meðal ann­ars vegna fram­boðs­trufl­ana í heims­hag­kerf­inu í kjö­far far­sótt­ar­inn­ar, en alþjóð­legt olíu- og hrá­vöru­verð hefur einnig hækkað mikið und­an­far­ið.

Nefndin nefnir einnig áhrif geng­is­lækk­unar krón­unnar í fyrra á verð­vísi­töl­una, sem og miklar hækk­anir launa og hús­næð­is­verðs. Það sé því nauð­syn­legt að hækka vexti bank­ans til þess að tryggja kjöl­festu verð­bólgu­vænt­inga í verð­bólgu­mark­mið­inu.