S. Björn Blöndal, oddviti Bjartrar framtíðar í Reykjavík, segir að flokkurinn og formaður hans eigi að hugsa sína stöðu alvarlega. Flokkurinn þurfi að skoða hvert hann vill stefna og hvort hann vill verða afl í þessu landi. Guðmundur Steingrímsson, formaður Bjartrar framtíðar, ætlar ekki að tjá sig um gagnrýni Heiðu Kristínar Helgadóttur, fyrrum stjórnarformanns flokksins, á hann í dag. Enginn þingmaður Bjartrar framtíðar hefur lýst yfir afdráttarlausum stuðningi við formann flokksins. Þetta kom fram í fréttum RÚV í kvöld.
Heiða Kristín varpaði sprengju inn í Bjarta framtíð í viðtali við Kjarnann á þriðjudag. Þar sagði hún að það þyrfti mikið að gerast hjá Bjartri framtíð, flokkinum sem hún tók þátt í að stofna, til að henni finnist ákjósanlegt að stíga inn á þann vettvang á ný, en hún hætti störfum fyrir flokkinn í lok síðasta árs. „Mér finnst vandi Bjartrar framtíðar vera inni í Bjartri framtíð, hann er ekki vandi kjósenda. Vandinn er ekki tilkominn vegna þess að kjósendur skilja ekki flokkinn heldur er hann vandi formannsins [Guðmundar Steingrímssonar] og þeirra sem starfa í Bjartri framtíð.“
Heiða Kristín bætti um betur í þættinum Vikulokunum á Rás 1 í gær. Þar sagðist hún treysta sér fullkomlega til þess að verða formaður Bjartrar framtíðar. Ef það sé vilji fyrir því innan flokksins þá sé hún tilbúin að bjóða sig fram til formanns. Það getur hún gert í september næstkomandi þegar ársfundur flokksins fer fram. Í þættinum gagnrýndi hún Guðmund, formann flokksins sem stofnaði hann með henni á sínum tíma, og sagði hann hafa fengið ágætis tækifæri til að sanna sig en að forysta hans væri augljóslega ekki að virka.
Fylgi Bjartrar framtíðar hefur hríðfallið undanfarið. Í könnun sem MMR birti í vikunni sögðust einungis 4,4 prósent kjósenda ætla að kjósa flokkinn, sem er versta útkoma hans í mælingum MMR á þessum kjörtímabili. Miðað við það fylgi myndi Björt framtíð ekki ná inn manni í komandi kosningum. Flokkurinn mældist með um 20 prósent fylgi í könnunum í fyrrahaust.
Í fréttum RÚV í kvöld kom fram að enginn þingmanna Bjartrar framtíðar hefðu lýst yfir afdráttarlausum stuðningi við Guðmund Steingrímsson sem formann flokksins. Guðmundur sagði sjálfur við RÚV að hann ætlaði ekki að tjá sig um málið í dag.
