Lilja Alfreðs­dótt­ir, ráð­herra ferða­mála, við­skipta og menn­ing­ar, segir það sína skoðun að heim­ilt eigi að vera að loka Reyn­is­fjöru sem og öðrum ferða­manna­stöðum ef svo beri und­ir. „Ég sem ráð­herra mála­­flokks­ins horfi auð­vitað á heild­­ar­hags­muni hans. Það er ekki gott fyr­ir heild­ina þegar það eru orðnir ein­hverj­ir stór­hætt­u­­leg­ir staðir og við ger­um ekk­ert í því,“ seg­ir hún í sam­tali við Morg­un­blaðið í dag. Er hún varð ráð­herra ferða­mála var það eitt hennar fyrsta verk að skipa starfs­hóp um Reyn­is­fjöru og hvort það ætti „að loka henni hrein­lega.“

Alls hafa tólf alvar­leg útköll borist vegna fólks í hættu í Reyn­is­fjöru síð­ustu sjö árin. Þar af hafa orðið fimm banaslys. Það fimmta varð á föstu­dag er erlendur ferða­maður á átt­ræð­is­aldri lést er alda hreif hann með sér í fjör­unni. Eig­in­kona hans var hætt komin en við­stöddum tókst að bjarga henni.

Lilja segir að til ýmissa ráð­staf­ana hafi verið gripið m.a. að setja upp merk­ingar en að ferða­menn virði þær margir hverjir að vettugi. Land­eig­endum og þeim sem hafi afnot af svæð­inu hafi ekki tek­ist að ná utan um mál­ið.

Í Morg­un­blað­inu kemur enn­fremur fram að til­lögur að frek­ari úrbótum sem höfðu verið fjár­magn­aðar hafi ekki orðið að veru­leika vegna mót­mæla nokk­urra land­eig­enda. Aðrir land­eig­endur hafi hins vegar beitt sér fyrir auknu öryggi.

Jónas Guð­munds­son hjá Lands­björg sagði við Vísi árið 2017 er þýsk kona fórst í Reyn­is­fjöru og barn á leik­skóla­aldri var hætt komið að vanda­málið fælist í því að eng­inn ábyrgð­ar­að­ili væri á staðn­um. Nefndi hann nokkur atriði til úrbóta sem væru notuð víða um heim, m.a. svo­kall­aða hand­stýr­ingu; skilti, stíga og girð­ingar sem og það sem hann kall­aði „beina stjórn­un“ með lög­um, reglu­gerð­um, lög­gæslu og land­vörslu. „Á þessum stöðum á auð­vitað að vera land­varsla og virk­ari lög­gæsla. Þannig að bæði land­vörður og lög­regla komi á þessa staði á svona degi og eru með sitt áhættu­mat og leggja mat á hvort aðstæður séu erf­iðar og hvort þurfi að setja upp borða sem segir að eng­inn fari neðar en ákveðið við­mið. Svo þarf land­vörður að vera á staðnum til að fylgja þessu eft­ir.“