Til­kynnt hefur verið um upp­sagnir starfs­manna á hjúkr­un­ar­heim­il­inu Hlíð á Akur­eyri. Helga Guð­rún Erlends­dótt­ir, hjúkr­un­ar­for­stjóri Heilsu­vernd hjúkr­un­ar­heim­ila, stað­festir í sam­tali við Kjarn­ann að upp­sagnir hafi átt sér stað á Hlíð en Heilsu­vernd hjúkr­un­ar­heim­ili sjá um rekstur Hlíð­ar. Guð­rún gat ekki sagt með vissu hver fjöldi upp­sagna hefði ver­ið.

Logi Már Ein­ars­son, þing­maður Sam­fylk­ing­ar­inn­ar, vakti athygli á mál­inu á Face­book síðu sinni í kvöld þar sem hann sagði að sam­kvæmt sínum heim­ildum hefði verið til­kynnt um upp­sagnir 26 starfs­manna á hjúkr­un­ar­heim­il­unum á Akur­eyri. Lyk­il­starfs­menn hafi verið í hópi þeirra sem sagt var upp.

„Í mörg ár hefur rík­is­valdið van­fjár­magnað mála­flokk­inn með þeim afleið­ingum að Akur­eyr­ar­bær neydd­ist til að segja upp samn­ingi um rekstur heim­il­inna, enda erfitt að rétt­læta að greiða tap ár eftir ár með pen­ingum sem áttu að fara í önnur mik­il­væg og jafn­vel lög­bundin verk­efni. Í stað þess að ríkið tæki við rekstr­inum einsog tíðkast víða um land, ákvað heil­brigð­is­ráð­herra og rík­is­stjórnin að bjóða hann út og einka­hluta­fé­lag tók við honum fyrir nokkrum vik­um. Og nú er sem sagt hag­ræð­ingin haf­in,“ sagði Logi í færslu sinni.

Drífa Snædal, for­seti ASÍ, birti upp­sagn­ar­bréf eins starfs­manns sem unnið hafði á hjúkr­un­ar­heim­il­inu Hlíð í 20 ár. Í færslu sinni á Face­book segir Drífa að nú ætli Heilsu­vernd hjúkr­un­ar­heim­ili að ná fram hag­ræð­ingu með upp­sögn­um. „Svei þeim og svei arð­væð­ing­unni! Nú á að losa sig við “dýra” starfs­fólkið og ná “hag­ræð­ing­u”. Starfs­fólkið er fyrst til að taka skell­inn, þetta líðst með vit­und og vilja ríkis og sveit­ar­fé­lags­ins!“

Heilsu­vernd tók við rekstri Öldr­un­ara­heim­ila Akur­eyrar í apríl á þessu ári. Á Akur­eyri rekur það nú dval­ar- og hjúkr­un­ar­heim­ilið Hlíð og hjúkr­un­ar­heim­ilið Lög­manns­hlíð í Gler­ár­hverfi.