Ákvörðun stjórn­valda um að setja tvo millj­arða í að aðstoða flótta­menn og styrkja ferla sem snúa að þjón­ustu við hæl­is­leit­endur er til marks um stjórn­völd taki nær for­dæma­lausan vanda alvar­lega og ætli að leggja sitt af mörk­um. Ekki eru nema þrjár vikur síðan stjórn­völd stefndu að því að taka á móti 50 flótta­mönn­um, en með mik­illi opin­berri umræðu og upp­lýs­ingum um þann gríð­ar­lega vanda sem hátt í 25 millj­ónir manna, sem flúið hafa stríðs­hrjáð svæði Sýr­lands, Íraks og Afganistan, standa frammi fyr­ir, þá breytt­ust áform­in.

Á til­tölu­lega skömmum tíma, innan við þremur vik­um, hafa stjórn­völd ákveðið að marg­falda aðstoð­ina frá því sem áður hafði verið ákveð­ið, og eiga þau hrós skilið fyrir það. Það flókn­asta er vita­skuld eft­ir, sem er fram­kvæmdin á mál­inu öllu og góð og mann­úð­leg mót­taka fyrir flótta­menn­ina sem hingað munu koma og hefja nýtt líf.

Sig­mundur Davíð Gunn­laugs­son for­sæt­is­ráð­herra sagði vand­ann umfangs­mik­inn, en að Ísland myndi leggja sitt af mörkum og að sú aðstoð gæti jafn­vel orðið öðrum þjóðum fyr­ir­mynd. „Með starfi nefnd­­ar­inn­ar og fjölda fólks sem er búið að aðstoða okk­ur í þess­­ari vinnu, bæði í ráðu­neyt­um og eins hinum ýmsu fé­laga­­sam­tök­um, er þó búið að tak­­ast að setja sam­an áætl­­un sem við höf­um mikla trú á og telj­um að muni stand­­ast all­an sam­an­b­­urð við það sem aðrar þjóðir eru að gera til þess að tak­­ast á við þetta mikla vanda­­mál og geti jafn­­vel orðið öðrum hvatn­ing,“ sagði Sig­mundur Dav­íð, sam­kvæmt end­ur­sögn mbl.­is.

Stjórn­völd eru með þess­ari fram­taks­sem­i að sýna metnað og mannúð í verki, og ljóst að ef umfang þeirrar aðstoðar sem Ísland ætlar að leggja til þessa gríð­ar­lega mikla vanda sem alþjóða­sam­fé­lagið stendur frammi fyr­ir, verður í takt við það sem Sig­mundur Davíð lýs­ir, þá má horfa til þess­ara ákvarð­ana með stolti.

Það má samt ekki gleyma því að margar þjóðir hafa nú þegar gripið til gríð­ar­lega umfangs­mik­illa aðgerða til að koma til móts við flótta­menn, ekki síst þá sem hafa kom­ist alla leið til Evr­ópu frá stríðs­hrjáðum svæð­um. Ef að Ísland ætlar að taka á móti jafn mörgum hlut­falls­lega og Þjóð­verjar hafa ákveðið að taka á móti á þessu ári, þá munu 3.247 flótta­menn koma hing­að, að því er Þröstur Freyr Gylfa­son, stjórn­mála­fræð­ingur og ráð­gjafi, nefndi á Face­book síðu sinni í gær. Ef vel á að takast til í þessu flókna máli mun reyna á sam­stöðu stjórn­mála­manna þvert á flokkslínur og sveit­ar­fé­lög, en kannski umfram allt góðan vilja til þess að rétta fram útrétta hjálp­ar­hönd til fólks í neyð.