Á fjallinu Sornfelli, fáeina kílómetra fyrir utan Þórshöfn, starfrækti Bandaríkjaher ratsjárstöð undir merkjum Nató mestallt Kalda stríðið. Eðli og umfangi starfseminnar var að mestu haldið leyndu fyrir heimamönnum, þar sem bandarísk og dönsk yfirvöld sáu enga ástæðu til að hafa heimamenn með í ráðum umfram það sem brýnasta nauðsyn krafði. Herstöðvaandstaðan í Færeyjum var alla tíð öflug og því fagnað innilega þegar slökkt var á hernaðarhluta ratsjárstöðvarinnar á Sornfelli á nýársdag 2007.
En það getur verið erfitt að kveða niður gamla drauga. Á síðustu árum hafa bandarísk hernaðaryfirvöld sótt í síaukin umsvif um gjörvallt Norður-Atlantshaf. Uppbygging flugvalla á Grænlandi og margvísleg hernaðaráform á Íslandi eru til marks um þá þróun. Eins hafa komið fram óskir um að endurvekja ratsjárstöðvar Nató í Færeyjum.
Fyrr á þessu ári upplýstu dönsk stjórnvöld að þau hefðu náð samkomulagi við Atlantshafsbandalagið um ratstjárstöðvarbyggingu á Sornfelli. Ekkert var hirt um að ræða málið við heimamenn og urðu viðbrögðin því skiljanlega afar hörð. Segja má að í Færeyjum skiptist almenningsálitið í þrennt þegar kemur að ratstjárstöðvarmálinu: í fyrsta lagi eru það þeir sem vilja fylgja forskrift Danmerkur og Nató í einu og öllu. Í öðru lagi eru það þeir sem gætu vel hugsað sér bandarísk hernaðarumsvif á eyjunum á nýjan leik, en vilja að slíkt sé gert í samráði við heimamenn. Þessi afstaða hefur til að mynda verið sterk innan Fólkaflokksins, sem svipar í stefnumálum um margt til Sjálfstæðisflokksins á Íslandi. Í þriðja lagi er það hópurinn sem hafnar hernaðarumsvifum alfarið og vill ekki sjá neina slíka uppbyggingu í Færeyjum. Skoðanakannanir gefa til kynna að sú afstaða njóti meirihlutastuðnings almennings, en valdahlutföllin á færeyska Lögþinginu eru með öðrum hætti.
Miðvikudaginn 21. júlí verður efnt til mótmæla í Þórshöfn gegn ratsjárstöðvaáformunum í Færeyjum. Aðstandendur þeirra mótmæla eru ungliðahreyfingar þeirra flokka sem hafna hernaðaruppbyggingunni. Íslenskir friðarsinnar munu ekki láta sitt eftir liggja að þessu tilefni. Samtök hernaðarandstæðinga efna til samstöðumótmæla við Sendiskrifstofu Færeyja á miðvikudagskvöld kl. 20. Þar gefst prýðilegt færi til að sýna samstöðu með grönnum okkar Færeyingum og mótmæla í leiðinni bandarískum herskipakomum í Reykjavíkurhöfn.
Höfundar eru fulltrúar í miðnefnd Samtaka hernaðarandstæðinga.
