19:52 - Segjum þetta gott í bili 

Jæja. Þökkum fyrir annan dag­inn af beinni lýs­ingu atburða hér á Kjarn­an­um. Sjáum svo til hvort morg­un­dag­ur­inn verður þess eðlis að við höfum beina lýs­ingu áfram. 

19:30 - Einar K. segir fund sinn með for­set­anum góð­an 

Einar K. Guð­finns­son, for­seti Alþing­is, segir fund sinn með for­seta Íslands hafa verið góð­an. „Þetta var fyrst og fremst upp­lýs­inga­fund­ur. Það var engin nið­ur­staða eða neitt slíkt,“ sagði hann í sam­tali við Sunnu Val­gerð­ar­dótt­ur, blaða­mann Kjarn­ans, fyrir stund­u. 

19:20 - Ólafur Ragnar svarar Sig­mundi Davíð

„Það var ljóst í sam­ræðum okkar að einn meg­in­til­gangur þess að koma í flýti hingað var að fá slíkt fyr­ir­heit sem hann gæti síðan notað sem vopn í við­ræðum við for­mann Sjálf­stæð­is­flokks­ins,“ sagði for­seti Íslands um Sig­mund Davíð Gunn­laugs­son í fréttum RÚV nú í kvöld. Hann sagði ekki við hæfi að hann elti ólar við frá­sögn Sig­mundar en það hafi ekki verið neinn mis­skiln­ingur þeirra á milli um það sem fram fór á fund­in­um. 

19:01 - Beint frá mót­mæl­un­um 

Hér má fylgj­ast með mót­mæl­unum í beinni útsend­ing­u. 

18:58 - Þing­menn Sjálf­stæð­is­flokks­ins vissu ekki af til­lög­unni um Sig­urð Inga 

Þing­flokkur Sjálf­stæð­is­flokks­ins vissi ekki af ákvörðun Sig­mundar Dav­íðs Gunn­laugs­sonar um að stíga til hliðar og leggja til að Sig­urður Ingi Jóhanes­son yrði for­sæt­is­ráð­herra í hans stað. Sig­urður Ingi til­kynnti um þessa til­lögu Fram­sókn­ar­flokks­ins þegar Bjarni Bene­dikts­son fjár­mála­ráð­herra var á leið á Bessa­staði að hitta for­seta Íslands. Lesið meira um það hér. 

18:50 - Mót­mæl­endur stefna að Val­höll 

Mót­mælin á Aust­ur­velli voru færð að Fram­sókn­ar­hús­inu við Hverf­is­götu fyrir um það bil hálf­tíma síð­an. Svo var ákveðið að fylkja liði í Val­höll, þar sem Bjarni Bene­dikts­son og Sig­urður Ingi Jóhanns­son hafa verið að funda. Mót­mæl­endur eru á leið þangað gang­andi nún­a. 

18:14 - Fólk streymir enn á Aust­ur­völl 

Það eru ekki eins margir að mót­mæla og í gær, en fólki fer fjölg­andi á Aust­ur­velli að sögn lög­reglu. Þrír fjórðu hlutar af Aust­ur­velli eru þaktir mót­mæl­endum og enn streymir fólk að, segir á mbl.­is. 

18:07 - Einar K. veit ekki af hverju hann er kom­inn á Bessa­staði 

Einar K. Guð­finns­son for­seti Alþingis er kom­inn á Bessa­staði til fundar við for­seta Íslands. Hann veit ekki hvert til­efni fund­ar­ins er eða hvað verður rætt, sagði hann við fjöl­miðla áður en hann fór á fund­inn. 

18:02 - Fram­sókn­ar­menn segj­ast styðja Sig­mund Davíð áfram 

Þing­flokkur Fram­sókn­ar­flokks­ins styður Sig­mund Davíð Gunn­laugs­son, for­mann flokks­ins og frá­far­andi for­sæt­is­ráð­herra, eftir atburði dags­ins. Þing­flokk­ur­inn lýsir ánægju með „þá virð­ing­ar­verðu afstöðu for­manns­ins sem felst í því að hann skuli vera reiðu­bú­inn að stíga þetta skref til að gera rík­is­stjórn­inni kleift að vinna áfram að þeim mik­il­vægu verk­efnum sem nú liggja fyr­ir.” Þetta kemur fram í til­kynn­ingu frá þing­flokkn­um. 

17:37 - Sig­mundur Davíð ætlar að vera þing­maður áfram 

Sig­mundur Davíð Gunn­laugs­son hyggst sitja áfram á þingi. Ásmundur Einar Daða­son, þing­flokks­for­maður Fram­sókn­ar­flokks­ins, segir við mbl.is að það sé almennur stuðn­ingur við til­lög­una um að hann víki sem for­sæt­is­ráð­herra fyrir Sig­urði Inga. 

17:30 - Þrjú pró­sent treystu Sig­urði Inga best 

Þrjú pró­sent aðspurðra sögð­ust bera mest traust til Sig­urðar Inga Jóhann­es­son­ar, sjáv­ar­út­vegs- og land­bún­að­ar­ráð­herra, af ráð­herrum rík­is­stjórn­ar­innar í könnun Frétta­blaðs­ins og Stöðvar 2 síðan um miðjan mars. Þetta og fleira má lesa í nýrri frétt Sunnu Val­gerð­ar­dótt­ur. 

17:23 - Útspilið aldrei að verða sátta­grund­völlur

Sé mið tekið af sam­tölum sem Kjarn­inn hefur átt í dag, bæði við stjórn­ar­þing­menn og þing­menn stjórn­ar­and­stöðu, þá var þetta útspil aldrei mögu­legt til þess að verða sátta­grund­völlur á Alþingi eða mæta kröfum um nýtt upp­haf, eins og greina mátti með áber­andi hætti í fjöl­menn­ustu mót­mælum á Íslandi í seinni tíð í gær, og stjórn­ar­and­staðan hefur lagt áherslu á. Til­lagan kom flestum í stjórn­ar­and­stöð­unni á óvart. Krafan um nýtt upp­haf með kosn­ingum kemur nær ein­róma frá stjórn­ar­and­stöð­unni, segir í frétta­skýr­ingu Magn­úsar Hall­dórs­son­ar. 

16:49 - Sig­mundur Davíð segir for­set­ann ljúga 

Sig­mundur Davíð Gunn­laugs­son, frá­far­andi for­sæt­is­ráð­herra, segir að hann hafi ekki borið fram form­lega til­lögu um þing­rof á fundi sínum með for­seta Íslands fyrr í dag, líkt og skilja hefði mátt af ummælum for­set­ans að fundi lokn­um. Þetta kemur fram í yfir­lýs­ingu frá for­sæt­is­ráðu­neyt­inu sem send var út rétt í þessu. Meira hér. 

16:37 - Við leysum ekk­ert með stóla­skipt­um 

Þetta segir Árni Páll Árna­son. „Við erum að upp­lifa dauða­teygjur þess­arar rík­is­stjórn­ar. Þetta er upp­hafið að enda­lok­un­um.“ 

16:35 - Krafan var að Sig­mundur stigi til hlið­ar 

Bjarni Bene­dikts­son vill halda sam­starf­inu áfram, það er nið­ur­staðan í bili. Hann segir að krafan hafi verið að Sig­mundur Davíð viki. Nú er að sjá hversu margir mæta á mót­mæli sem búið er að boða að hefj­ist klukkan 17 í dag, rétt eins og í gær. 

16:28 - Bjarni ætlar að hugsa málið

Bjarni Bene­dikts­son fjár­mála­ráð­herra ætlar að hugsa mál­ið, segir hann að loknum fundi sínum með for­seta Íslands. Hann segir að nú þurfi hann og Sig­urður Ingi að ræða saman næstu daga. Hann vill tryggja far­sæla lausn í sam­starfi við Fram­sókn­ar­menn, og mun ekki gera kröfu um að verða for­sæt­is­ráð­herra. Lesið meira um það sem Bjarni segir hér. 

16:14 - Ólík­legt að það verði þing­fundur í dag

Einar K. Guð­finns­son for­seti þings­ins tal­aði við fjöl­miðla rétt í þessu og segir að það sé ólík­legt að hægt verði að halda þing­fund í dag eins og stjórn­ar­and­staðan hefur óskað eft­ir. Hann mun funda með for­seta Íslands þegar hann hefur fundað með stjórn­ar­and­stöð­unni.

16:03 - Hvað nú? 

Nú er þess beðið að Bjarni Bene­dikts­son komi út af fundi með for­seta Íslands og skýri von­andi stöð­una sem upp er kom­in. 

Nið­ur­staða Fram­sókn­ar­flokks­ins er algjör kúvend­ing frá því í morg­un, þegar for­sæt­is­ráð­herra hót­aði Sjálf­stæð­is­flokknum þing­rofi og kosn­ingum ef þing­menn hans styddu ekki rík­is­stjórn­ina áfram. Nú er það allt í einu ekki inni í mynd­inni hjá fram­sókn­ar­mönn­um. En spurn­ingin er hvað Ólafur Ragnar og Bjarni eru að ræða. 

15:47 - Fylgst með for­sæt­is­ráð­herra­efni fram­sókn­ar 

Á þess­ari mynd má sjá Ótt­arr Proppé og Birgittu Jóns­dóttur fylgj­ast með Sig­urði Inga Jóhanns­syni til­kynna að hann sé nýtt for­sæt­is­ráð­herra­efni Fram­sókn­ar­flokks­ins.

15:41 - Stjórn­ar­and­staðan óskar eftir fundi með for­seta þings­ins 

Stjórn­ar­and­staðan hefur óskað eftir fundi með Ein­ari K. Guð­finns­syni for­seta Alþingis klukkan 16.15. Þar verður farið fram á að þing verði kallað saman strax til að ráða úr stöð­unni. Það er ennþá krafa stjórn­ar­and­stöð­unnar að boðað verði til kosn­inga. Sunna Val­gerð­ar­dótt­ir, blaða­maður Kjarn­ans, greinir okkur frá þessu en hún stendur nú vakt­ina í Alþing­is­hús­inu eftir að hafa verið á Bessa­stöðum fyrr í dag. 

15:38 - Eðli­leg­ast að boða til kosn­inga 

Þetta segir Birgitta Jóns­dóttir Pírati um nýj­ustu tíð­ind­i. 

15:30 - Fram­sókn­ar­flokk­ur­inn sam­þykkir að Sig­urður Ingi taki við 

Sig­urður Ingi Jóhanns­son vara­for­maður Fram­sókn­ar­flokks­ins til­kynnir nú að Sig­mundur Davíð Gunn­laugs­son hafi lagt til að Sig­urður Ingi taki við for­sæt­is­ráðu­neyt­inu. Það hafi þing­flokkur Fram­sókn­ar­flokks­ins sam­þykkt. Búið er að greina Bjarna Bene­dikts­syni for­manni Sjálf­stæð­is­flokks­ins frá þess­ari til­lög­u. 

15: 23 - Sig­mundur segir margt skemmti­legt og áhuga­vert að ger­ast 

Fram­sókn­ar­menn vildu ekk­ert segja við blaða­menn um nið­ur­stöðu þing­flokks­fundar síns, sem var að ljúka í Alþing­is­hús­inu. Sig­mundur Davíð Gunn­laugs­son sagði margt mjög skemmti­legt og áhuga­vert að ger­ast, og það væri alveg til­efni fyrir spenn­ingi meðal fjöl­miðla­manna sem reyndu að fá hann til að tjá sig. Hann vildi hins vegar ekk­ert segja meira. Hann sagð­ist ætla að ræða við blaða­menn fljót­lega. 

15:12 - Þing­menn fram­sóknar koma út af fundi 

Þing­menn Fram­sókn­ar­flokks­ins vilja ekk­ert segja um það sem fram fór á þing­flokks­fundi þeirra. Það er komin nið­ur­staða í málið en Karl Garð­ars­son þing­maður segir að það ríki trún­að­ur. 

15:05 - Bjarni er á leið á Bessa­staði 

Bjarni Bene­dikts­son er á leið­inni á Bessa­staði að hitta for­seta Íslands. Hann vildi ekki tjá sig við fjöl­miðla. 

14:56 - Júl­íus Víf­ill efldi traust á borg­ar­stjórn 

Júl­íus Víf­ill hefur eflt traustið á borg­ar­stjórn með því að víkja úr borg­ar­stjórn vegna skatta­skjóls­mála sinna. Þetta segir Dagur B. Egg­erts­son borg­ar­stjóri. Hann segir þó ljóst að mikið verk sé fyrir hönd­um. „Traust á póli­tík í land­inu öllu er því miður í lág­marki, og þar se borg­ar­stjórn því miður engin und­an­tekn­ing. Því þurfum við svo sann­ar­lega að breyta.“ Hall­dór Hall­dórs­son, odd­viti sjálf­stæð­is­manna í borg­ar­stjórn, segir líka að þessi ákvörðun Júl­í­usar bæti traustið á stjórn­mál­um. Hann hafi sagt af sér. 

14:47 - Fram­sókn enn að funda og for­menn stjórn­ar­and­stöðu­flokka líka 

Fram­sókn­ar­flokk­ur­inn er enn að funda, þrátt fyrir að ein­hverjir þing­menn hafi yfir­gefið fund­inn. For­menn stjórn­ar­and­stöðu­flokk­anna eru líka að funda í þing­hús­inu um stöð­una sem komin er upp. 

14:40 - Þjóðin á rétt á að koma að mál­um 

Stein­grímur J. Sig­fús­son þing­maður VG og fyrr­ver­andi fjár­mála­ráð­herra segir að þjóðin eigi rétt á að koma að málum eftir svona dramat­íska atburði. Það sé alveg ljóst að rík­is­stjórn­ar­sam­starfið sé búið. 

14:35 - 45 dagar þýðir 20. maí 

Eins og greint hefur verið frá verður að boða til kosn­inga innan 45 daga frá þing­rofi. Ef það ger­ist í dag þá er sú dag­setn­ing 20. maí. Það vill svo til að það er sami dagur og fram­boðs­frestur rennur út til for­seta­kjör­s. 

14:32 - Hildur Sverr­is­dóttir verður borg­ar­full­trúi 

Þau tíð­indi að Júl­íus Víf­ill Ingv­ars­son hafi sagt af sér þýða að Hildur Sverr­is­dóttir er orðin borg­ar­full­trúi fyrir Sjálf­stæð­is­flokk­inn. Sóley Tóm­as­dótt­ir, for­seti borg­ar­stjórn­ar, sagði við RÚV nú fyrir skömmu að hún teldi ákvörðun Júl­í­usar góða. 

14:31 - Svein­björg Birna ætlar ekki að snúa aftur strax

Svein­björg Birna Svein­björns­dótt­ir, borg­ar­full­trúi Fram­sókn­ar­flokks­ins og flug­vall­ar­vina í Reykja­vík, ætlar ekki að snúa aftur til starfa fyrr en yfir­ferð innri end­ur­skoð­unar Reykja­vík­ur­borg­ar, um hags­muna­skrá­ingu borg­ar­full­trúa, er lokið en for­sætis­nefnd Reykja­vík­ur­borgar sam­þykkti til­lögu um að fela innri end­ur­skoðun og siða­nefnd Sam­bands íslenskra sveit­ar­fé­laga, að taka til skoð­unar hags­muna­skrán­ingu borg­ar­full­trúa. „Ég styð slíka til­lögu og mun aðstoða fram­an­greinda aðila við þá vinnu í hví­vetna,“ segir Svein­björg Birna í yfir­lýs­ing­u. 

14:22 - Þing­menn Sjálf­stæð­is­flokks­ins funda 

Þing­menn Sjálf­stæð­is­flokks­ins funda nú í Val­höll. Jón Gunn­ars­son sagði atburði dags­ins vera óvænta og reyfara­kennda atburð­ar­rás. 

14:12 - Júl­íus Víf­ill segir af sér 

Júl­íus Víf­ill Ingv­ars­son, borg­ar­full­trúi Sjálf­stæð­is­flokks­ins, hefur sagt af sér emb­ætti. Þetta gerð­ist á borg­ar­stjórn­ar­fundi rétt í þessu. Innan skamms verður hægt að lesa meira um þetta hér. 

14:07 -  Össur Skarp­héð­ins­son rýfur þögn­ina 

Össur Skarp­héð­ins­son, þing­maður Sam­fylk­ing­ar, hefur rofið þögn sína um mál­efni dags­ins. Hann var eini þing­maður stjórn­ar­and­stöð­unnar sem tal­aði ekki um van­traust­s­til­lögu stjórn­ar­and­stöðu­flokk­anna á Alþingi í gær. „Tortóla virð­ist í beinni útsend­ingu vera orð­inn bana­biti rík­is­stjórn­ar­inn­ar.“ 

„Í fyrsta lagi er lík­legt að Fram­sókn­ar­flokk­ur­inn komi mjög illa út úr kosn­ingum við þessar aðstæður og hótun for­sæt­is­ráð­herr­ans felur í reynd í sér að stærstum hluta þing­flokks hans verði rutt af þingi út á hinar eilífu veiði­lend­ur. Flestir flokk­ar, þ.á.m. Sjálf­stæð­is­flokk­ur­inn er lík­legri til að koma betur út úr kosn­ingum en Sjálf­stæð­is­flokk­ur­inn. 

Í öðru lagi er það krafa stjórn­ar­and­stöð­unnar að þing verði rofið og nýjar kosn­ingar boð­að­ar. Hótun for­sæt­is­ráð­herra um að beita sér fyrir kosn­ingum færir því stjórn­ar­and­stöð­unni sigur í núver­andi þrætu á silf­ur­bakka. Til­lagan um van­traust virð­ist eig­in­lega búin að fella rík­is­stjórn­ina áður en hún kemur á dag­skrá þings­ins. Ég man ekki eftir sér­kenni­legri vend­ingum í stjórn­mál­u­m.“

13:56 - Þing­rofs­réttur ekki kúg­un­ar­réttur for­sæt­is­ráð­herra 

Árni Páll Árna­son for­maður Sam­fylk­ing­ar­innar segir að þing­rofs­réttur sé ekki tæki for­sæt­is­ráð­herra á hverjum tíma til að kúga sam­starfs­flokk. „Krafa um afsögn SDG og kosn­ingar er á borð­inu og SDG getur ekki skotið sér undan henni með klækja­brögð­um. Gott að sjá að for­set­inn stoppar hann af. Nú blasir bara við sam­þykkt van­trausts og kosn­ingar innan 45 daga.“ 

13:47 - Þessi rík­is­stjórn er „splundruð, sprung­in, horf­in, far­in“ 

Splundruð, sprung­in, horf­in, farin voru orðin sem Guðni Th. Jóhann­es­son sagn­fræð­ingur not­aði um rík­is­stjórn­ina. 

13:37 - Þor­gerður Katrín vill alla flokka í stjórn

13:33 - Ráðu­neytin í hefð­bundnum verk­efnum

Það er svo­lítið fyndið að fylgj­ast með upp­lýs­inga­full­trúum ráðu­neyta, sem senda frá sér frétta­til­kynn­ingar um hin ýmsu mál. Manni finnst ein­hvern veg­inn eins og það sé ekki alveg í takti við stemmn­ing­una í þjóð­fé­lag­inu í dag, þegar við vitum ekki einu sinni hvort rík­is­stjórnin lifi dag­inn. 

13:26 - Þing­flokkur Fram­sókn­ar­flokks­ins fundar án for­manns­ins 

Sig­mundur Davíð Gunn­laugs­son er ekki á fundi þing­flokks Fram­sókn­ar­flokks­ins. Frá þessu er greint á Vísi, sem segir að for­sæt­is­ráð­herra sé í stjórn­ar­ráð­in­u. 

13:22 - Ein­leikur Sig­mundar Dav­íðs 

Sig­mundur Davið Gunn­laugs­son for­sæt­is­ráð­herra er að leika mik­inn ein­leik um þessar mund­ir. Fundur hans með Bjarna Bene­dikts­syni, for­manni Sjálf­stæð­is­flokks­ins, í morgun fór ekki vel, sam­kvæmt upp­lýs­ingum Kjarn­ans. Hann virð­ist ekki hafa rætt við neinn um ákvörðun sína um að fara á Bessa­staði og óska eftir þing­rofi. Lestu frétta­skýr­ingu Kjarn­ans um ein­leik for­sæt­is­ráð­herr­ans. 

13:14 - Á að vera úrlausn­ar­efni þings­ins 

Staðan á að vera úrlausn­ar­efni þings­ins, segir Katrín Jak­obs­dótt­ir, for­maður VG. Henni hugn­ast ekki hug­myndin um utan­þing­stjórn. 

13:13 - Orðið á göt­unni að for­set­inn ætli kannski að mynda utan­þing­stjórn

Það kom fram í fréttum RÚV að „orðið á göt­unni“ í þing­hús­inu sé að mögu­lega ætli Ólafur Ragnar sér að mynda utan­þing­stjórn. 

13:00 - Í meira lagi óvenju­legt hvernig for­set­inn bregst við

Björg Thoraren­sen pró­fessor í stjórn­skip­un­ar­rétti þekkir ekki dæmi þess að for­seti hafi form­lega og með rök­studdri afstöðu hafnað til­lögu for­sæt­is­ráð­herra um þing­rof, eins og Ólafur Ragnar hafi gert í dag. Hann hafi tekið það upp á sína arma að gæta hags­muna meiri­hluta þings­ins, sem sé í meira lagi óvenju­legt. Það sé búið að breyta stjórn­skipan lands­ins þannig að þingið sjálft geti tek­ist á við þessa stöðu sem upp er kom­in. For­set­inn taki hins vegar að sér að verða gæslu­maður rík­is­stjórn­ar­innar og passa upp á að vilji meiri­hluta þings­ins liggi fyr­ir. 

„Hann gengur gegn þeirri venju sem alltaf hefur verið byggt á þegar óskað er þing­rofs. Þingið sjálft á að takast á við afleið­ingar af því að ákvarð­anir séu teknar gegn vilja þess.“ Hún sagði að henni væri ómögu­legt að spá fyrir um það hvað ger­ist næst. 

12:58 - Ólafur Ragnar slítur blaða­manna­fund­in­um 

Þetta eru stórpóli­tísk tíð­indi, það er ljóst. 

12:55 - Spurn­ing um hvers konar rík­is­stjórn situr

Það gæti komið til greina að rjúfa þingið áður en van­traust­s­til­laga er borin fram. Þetta er ekki bara spurn­ing um að þingið sé rofið heldur líka um það hvers konar rík­is­stjórn situr og hvort fólk sé sátt við að rík­is­stjórnin sitji í óbreyttri mynd fram að kosn­ing­um, segir for­set­inn. 

12:52 - Svarar ekki hvort hann íhugi að halda áfram sem for­seti

Ólafur Ragnar Gríms­son svarar ekki spurn­ingu um það hvort hann hygg­ist end­ur­skoða ákvörðun sína um að hætta sem for­set­i. 

Mynd­band af for­sæt­is­ráð­herra að yfir­gefa Bessa­staði

12:49 - Þjóðin sé sæmi­lega sátt 

Mik­il­vægt að ná sam­stöðu um far­sæla lend­ingu í mál­inu segir for­set­inn. Mik­il­vægt fyrir þjóð­ar­hag og heiður bæði út á við og inn á við. Þjóðin eigi að vera sæmi­lega sátt og þurfi ekki dag eftir dag að halda til mót­mæla. Lestu frétt um orð for­set­ans hér. 

12:46 - Ætlar að funda með Bjarna í dag 

Fundi lauk á Bessa­stöðum þannig að Ólafur Ragnar neit­aði að veita fyr­ir­heit um það hvenær hann sam­þykkir beiðni um þing­rof. Hann hefur ákveðið að eiga síðar í dag fund með Bjarna Bene­dikts­syni for­manni Sjálf­stæð­is­flokks­ins og fjár­mála­ráð­herra. Hann mun svo mögu­lega óska eftir fundi með for­seta Alþingis í fram­hald­inu og mögu­lega ann­arra flokka. 

12:44 - Ólafur Ragnar ekki til­bú­inn að sam­þykkja þing­rof strax 

For­set­inn ætlar ekki að veita Sig­mundi Davíð heim­ild til að rjúfa þing fyrr en hann ræðir við for­mann Sjálf­stæð­is­flokks­ins og aðra. Hann gefur ekk­ert fyr­ir­heit um það hvort hann sam­þykkir þá beiðni fyrr en hann hefur átt sam­töl við for­ystu­menn ann­arra flokka um þeirra afstöð­u. 

12:42 - Sig­mundur Davíð bað for­set­ann um þing­rof 

For­set­inn leggi sjálf­stætt mat á það hvort hann sam­þykki ósk for­sæt­is­ráð­herra um þing­rof. Ólafur Ragnar segir að for­seti hljóti að meta hvort stuðn­ingur sé við þá ósk hjá rík­is­stjórn­ar­flokkum og hvort lík­legt sé að þing­rof leiði til far­sællar nið­ur­stöð­u. 

12:40 - Ólafur Ragnar byrj­aður að tala

For­set­inn segir að hann hafi nú ekki ætlað að halda blaða­manna­fund en það væri óhjá­kvæmi­legt eftir ummæli Sig­mundar Dav­íðs í morgun og fund þeirra tveggja að hann geri skýra grein fyrir sínum sjón­ar­miðum og afstöð­u. 

Sig­mundur Davíð vildi flýta fundi með for­set­anum og Ólafur Ragnar varð við því. 

12:33 - Ólafur ætlar að ræða við fjöl­miðla­menn

Fjöl­miðla­fólki var hleypt inn á Bessa­staði og Ólafur Ragnar hlýtur því að ætla að ræða við það. Það er troð­fullt eins og sjá má hér að neð­an. 

12:27 - „Við sjáum til með það allt sam­an“ 

Sig­mundur Davíð sagði ekki mikið við fjöl­miðla­menn nú þegar hann fór út af fundi með for­set­an­um. Hann var spurður hvort það yrði þing­rof og sagði „við sjáum til með það allt sam­an“ áður en hann fór inn í bíl og lok­aði á eftir sér. 

12:22 - Hugn­ast ekki til­hugs­unin um kosn­ingar

Karl Garð­ars­son segir að honum hugn­ist ekki til­hugs­unin um kosn­ingar eftir 45 daga. 

12:18 - „Það ber okkur eng­inn til hlýðni“

Þetta sagði Guð­laugur Þór Þórð­ar­son, starf­andi þing­flokks­for­maður Sjálf­stæð­is­flokks­ins, rétt í þessu um það hvort Sig­mundur Davíð hafi ekki verið að hóta flokkn­um. Guð­laugur Þór sagði að sjálf­stæð­is­menn hefðu talað var­lega hingað til þess að huga að því sem skipti máli, sem sé þjóð­ar­hag­ur. Stjórn­mála­upp­lausn sé ekki þjóð­inni í hag. 

12:14 - Enn fundur á Bessa­stöðum - eng­inn Bjarni

Það eru fimmtán mín­útur frá því að Sig­mundur Davíð fór inn á fund Ólafs Ragn­ars Gríms­sonar for­seta Íslands. Minnst 20 blaða- og frétta­menn bíða eftir þeim fyrir utan Bessa­staði. Ekk­ert bólar á Bjarna Bene­dikts­syni fjár­mála­ráð­herra. 

12:07 - Við­brögð Sig­mundar komu Karli á óvart 

Sig­mundur Davíð greindi þing­flokki sínum ekki frá þeirri ákvörðun sinni að hann væri reiðu­bú­inn að rjúfa þing og boða til kosn­inga. Það stað­festi Karl Garð­ars­son í fréttum RÚV, sem sagði að við­brögð Sig­mundar Dav­íðs í mál­inu kæmu honum á óvart. „Hann hefði kannski átt að segja þing­flokknum þetta fyrst,“ sagði Karl. 

12:04 - Kosn­ingar yrðu innan 45 daga 

Ef verið er að ákveða að rjúfa þing á Bessa­stöðum kemur hann vænt­an­lega á Alþingi á eftir og les upp for­seta­bréf um þing­rof, segir Björg Thoraren­sen pró­fessor í fréttum RÚV. Þetta hefði þær afleið­ingar að boða verður til kosn­inga innan 45 daga en þing­rofið tekur ekki gildi fyrr en þann dag sem kosn­ingar eru haldn­ar. Fram að þeim tíma heldur þingið áfram að starfa. 

12:00 - Auka­frétta­tímar á RÚV og Stöð 2 

Auka­frétta­tímar eru bæði á RÚV og Stöð 2 fyrir áhuga­sama. 

11:53 - Kom­inn á Bessa­staði og vildi ekk­ert segja

Sig­mundur Davíð er kom­inn á Bessa­staði, eins og sjá má í með­fylgj­andi mynd­skeiði frá RÚV. Hann vildi ekk­ert segja við frétta­menn sem eru á staðn­um. 

Sig­mundur Davíð á leið­inni á Bessa­staði 

Já það virð­ist vera að hótun Sig­mundar Dav­íðs hafi ekki virkað til að halda rík­is­stjórn­inni sam­an. Hann er á leið­inni á Bessa­staði núna. Frétta­maður og ljós­mynd­ari Kjarn­ans eru á leið­inni þangað og við munum segja ykkur frá þessu um leið og fréttir ber­ast. Kannski er þetta bara fund­ur­inn sem búið var að boða að þeir Bjarni myndu eiga með Ólafi Ragn­ari. 

Stjórn­ar­and­staðan bregst við og er til­búin í kosn­ing­ar 

Leið­togar stjórn­ar­and­stöð­unnar eru til­búnir í kosn­ing­ar, eins og kemur fram í þess­ari frétt. 

Er hann að hóta Sjálf­stæð­is­flokkn­um? 

Sig­mundur Davíð Gunn­laugs­son og Bjarni Bene­dikts­son fund­uðu í morg­un. Nú rétt í þessu sendi Sig­mundur Davíð frá sér yfir­lýs­ingu á Face­book þar sem hann talar um öll góðu málin sem rík­is­stjórnin hafi unnið að, en að ef þing­menn Sjálf­stæð­is­flokks­ins treysti sér ekki til að styðja rík­is­stjórn­ina áfram þá muni hann rjúfa þing og boða til kosn­inga. 

Hvað þýðir þetta? Í morgun var talað um að mögu­lega yrði Sig­mundi ýtt til hliðar en reynt yrði að halda rík­is­stjórn­ar­sam­starf­inu áfram, en Sig­mundur virð­ist slá þann mögu­leika út af borð­inu. Hann leggur þetta þannig upp að það séu bara tveir mögu­leikar í stöð­unni. Annað hvort sé haldið áfram með óbreytta rík­is­stjórn eða boðað til kosn­inga. 

Vel­komin í dag númer tvö

Vel­komin í beina útsend­ingu af vett­vangi stjórn­mál­anna í dag. Það hefur mikið gengið á það sem af er degi og við­búið að það haldi áfram. Við ætlum að safna hér saman öllu því helsta sem fram kem­ur.