Í afgreiðslu Novot­el-hót­els­ins í mið­borg Var­sjár hangir uppi stórt plag­gat skreytt úkra­ínska og sænska fán­an­um. Rúta til Sví­þjóðar, stendur þar stórum stöf­um.

Í gær birt­ist tíu manna hópur Svía í and­dyr­inu. Þau voru öll klædd gulum vest­um, fólk á öllum aldri, ungir menn og eldri kon­ur. Hóp­ur­inn er kom­inn á þremur rútum til Var­sjár og í dag ætla þau að landa­mærum Úkra­ínu, sagði einn úr hópnum við blaða­mann Kjarn­ans í stuttu spjalli í gær.

Með í för eru birgðir af lækn­inga­vörum sem skildar verða eftir við landa­mær­in. Ráð­gert er að aka aftur til Sví­þjóðar með alls um 175 flótta­menn, sem er þó ekki nema lítið brota­brot af þeim þús­undum sem koma yfir landa­mærin til Pól­lands dag hvern.

Alls er áætlað að rúm­lega 2,1 milljón flótta­fólks hið minnsta hafi komið til Pól­lands af alls 3,5 millj­ónum sem yfir­gefið hafa Úkra­ínu og haldið til nágranna­ríkja í leit að skjóli undan árás­ar­stríði Rússa.

Í Var­sjá eru margir að leggja sitt af mörk­um. Lest­ar­stöðin í mið­borg­inni er ein margra mið­stöðva þess mann­úð­ar­starfs sem fer fram hér í pólsku höf­uð­borg­inni, sem hefur tekið við hund­ruðum þús­unda úkra­ínskra flótta­manna á örfáum vik­um.

Mat yfir­valda er að meira en 300 þús­und flótta­menn séu í borg­inni um þessar mund­ir, sem sam­svarar hart­nær tutt­ugu pró­senta aukn­ingu við þann fjölda fólks sem hér býr alla jafna.

Enn fleiri hafa svo dvalið hér um skemmri tíma á leið sinni á aðra áfanga­staði. Borg­ar­yf­ir­völd hér í Var­sjá gera ráð fyrir því að það þurfi að koma allt að hund­rað þús­und úkra­ínskum börnum og ung­mennum fyrir í skóla­kerf­inu, um ein­hvern tíma hið minnsta.

Stans­laus straumur

Í og við lest­ar­stöð­ina í mið­borg­inni eru tugir sjálf­boða­liða við störf dag hvern við að taka á móti og útdeila nauð­syn­legum varn­ingi fyrir fólkið sem þurft hefur að skilja nán­ast allt eftir handan landamær­anna.

Sjálf­boða­lið­arnir standa vakt­ina og send­ingar koma með reglu­legu milli­bili. Stundum á stórum sendi­ferða­bíl­um, en einnig ber­ast fram­lög frá fólki í smærri skömmt­um, fullir halda­pokar af hrein­læt­is­vörum og öðrum nauð­synjum sem þörf er fyr­ir.

Ætla má að mörgum þeirra sem lögðu á flótta vanti einnig létt­ari yfir­hafnir en þær sem teknar voru með skömmu eftir að inn­rásin hóf­st, þegar frostið sló í um tutt­ugu gráður á átaka­svæð­unum aust­ast í Úkra­ínu.

Hit­inn í Var­sjá náði sautján gráðum í gær, vorið er svo gott sem kom­ið.

Forð­ast óvissu ef hjá því verður kom­ist

Ungur sjálf­boða­liði sem blaða­maður ræddi við inni á lest­ar­stöð­inni sagði að gær­dag­ur­inn hefði verið hans fyrsti við sjálf­boða­störf­in, en hann talar rúss­nesku og getur því hjálpað til við þýð­ingar og aðstoðað rúss­nesku­mæl­andi flótta­fólk varð­andi skipu­lagn­ingu áfram­hald­andi ferða­lags, við að finna tíma­bundna gist­ingu í Var­sjá eða jafn­vel dval­ar­stað til lengri tíma í borg­inni eða nágrenni henn­ar.

Hann sagði aðal­lega þá sem eiga ein­hver tengsl til landa vestar í álf­unni leit­ast eftir því að fara þang­að. Fólk vilji síður fara út í algjöra óvissu og vera upp á yfir­völd komin ef það kemst hjá því.

Af þessum sökum ætli sér margir sem komnir eru til Pól­lands ekki að fara lengra – hér eiga margir Úkra­ínu­menn skyld­menni og vina­fólk, rétt eins og þennan unga sjálf­boða­liða, sem sjálfur á fjöl­skyldu í Úkra­ínu.

Flestir flótta­menn hafa svo auð­vitað ekki farið frá Úkra­ínu til þessa, en af þeim alls tíu millj­ónum sem þurft hafa að yfir­gefa heim­ili sín eru um 6,5 millj­ónir manna á ver­gangi í vest­ur­hluta lands­ins, sem er að mestu ósnert af átökum til þessa.

Sjálfur segir sjálf­boða­lið­inn ungi að hann eigi frænd­fólk í Kænu­garði, sem vilji ekki yfir­gefa borg­ina og allt sem þau þekkja þar, þrátt fyrir sprengjuregn og her­gný.