Stjórn Lindarhvols gerir athugasemdir við fréttaflutning

Lýsing
Auglýsing

Stjórn Lindarhvols, eignarhaldsfélags utan um stöðugleikaeignir ríkisins, segir að sala á hlut félagsins í Klakka ehf., áður Exista, hafi að öllu leyti verið í samræmi við reglur um starfsemi félagsins og að gagnsæi hafi að fullu verið tryggt í söluferlinu. Hluturinn var seldur til erlends vogunarsjóðs á 505 milljónir króna. Stjórnin gerir margháttaðar athugasemdir við fréttaflutning af sölunni. Þetta kemur fram í yfirlýsingu frá stjórn Lindarhvols.

Mikið hefur verið fjallað um söluferlið á hlut Lindarhvols í Klakka í Morgunblaðinu og Fréttablaðinu undanfarna daga. Í Fréttablaðinu í dag var sagt frá því að aðrir bjóðendur gruni að trúnaðargögnum hafi verið lekið til þeirra sem stýra vogunarsjóðnum Burlington Loan Management, sem keypti hlutinn í Klakka af ríkinu. Sömu aðilar telja að Magnús Scheving Thorsteinsson, forstjóri Klakka, hafi gert tilboð í hlutinn fyrir hönd BLM ehf., íslensks félags Burlington Loan Management, sem var fyrir stærsti eigandi Klakka. Í blaðinu var einnig rætt við Sigurð Valtýsson, framkvæmdastjóra félags í eigu bræðranna Lýðs og Ágústs Guðmundssona sem átti þriðja hæsta tilboðið í hlutinn, þar sem hann sagði stjórnarhætti Lindarhvols fyrir neðan allar hellur. Tilboð bræðranna, sem Kvika setti fram fyrir þá, var upp á 501 milljónir króna. Þeir voru aðalleigendur Klakka/Exista á árum áður og Sigurður var þá annar forstjóra fyrirtækisins. Í dag er helsta eign Klakka 100 prósent hlutur í fjármögnunarfyrirtækinu Lýsingu. 

Ríkið seldi vog­un­ar­sjóði

Auglýsing

Stjórn Lind­­ar­hvols, eign­­ar­halds­­­fé­lags í eigu íslenska rík­­is­ins, sam­­þykkti í lok októ­ber að selja 17,7 pró­­sent hlut rík­­is­ins í Klakka, sem hét áður Exista, til vog­un­­ar­­sjóðs­ins Burlington Loan Mana­­gement. Eftir við­­skiptin á Burlington um 75 pró­­sent hlut í Klakka, en helsta eign félags­­ins í dag er fjár­­­mögn­un­­ar­­fyr­ir­tækið Lýs­ing. Burlington, sem var einn umsvifa­­mesti kröf­u­hafi föllnu bank­anna og keypti gríð­­ar­­legt magn af kröfum á þá á eft­ir­­mark­aði fyrir lágar fjár­­hæð­ir, greiddi líkt og áður sagði 505 millj­­ónir króna fyrir hlut rík­­is­ins í Klakka. 

Lind­­ar­hvoll, sem tók við stöð­ug­­leika­fram­lags­­eignum rík­­is­ins, aug­lýsti til sölu eignir í umsýslu félags­­ins í lok sept­­em­ber. Það vakti athygli, enda mán­uður í kosn­­ingar þegar eign­­irnar voru aug­lýstar til sölu. 

Burlington gerði öðrum hlut­höfum Klakka yfir­­­tökutil­­boð. Smærri hlut­hafar, sem áttu hlut sem er verð­­met­inn á undir 2.000 evr­­­ur, myndu skulda banda­ríska fyr­ir­tæk­inu Wilm­ington Trust fé ef þeir myndu ganga að yfir­­­tökutil­­boði Burlington Loan Mana­­gement í hluti þeirra. Ástæðan er sú að Wilm­ington Trust, sem sér um umsýslu á kröfum og hluta­bréfum fyrir Klakka, rukkar 2000 evr­­­ur, um 248 þús­und krón­­ur, í umsýslu­­gjald fyrir að sjá um fram­­sal á eign­­ar­hlut­un­­um. 

Yfirlýsing stjórnar Lindarhvols í heild sinni:

Vegna umfjöllunar um sölu á hlut og tengdum kröfum ríkissjóðs í Klakka ehf. í fjölmiðlum, telur stjórn Lindarhvols ehf. nauðsynlegt að koma eftirfarandi á framfæri til leiðréttingar á rangfærslum og misskilningi í þeim fréttaflutningi.

Lindarhvoll ehf. var stofnað til að annast umsýslu, fullnustu og sölu á svokölluðum stöðugleikaeignum á grundvelli ákvæðis til bráðabirgða III í lögum nr. 36/2001 um Seðlabanka Íslands (nánari upplýsingar er að finna hér: http://lindarhvolleignir.is/um-okkur/). Félagið fylgir við starfrækslu sína þeim fyrirmælum sem sett voru í ofangreindu ákvæði til bráðabirgða og í samningi fjármála- og efnahagsráðherra. Reglur um starfsemi og starfshætti félagins voru settar á grundvelli þeirra fyrirmæla. Á heimasíðu félagsins má nálgast öll þessi gögn. Miklu skiptir að við störf félagsins sé tryggt að viðhöfð séu vönduð og fagleg vinnubrögð og að allt ferli við sölu og ráðstöfun á þeim stöðugleikaeignum sem hér um ræðir sé skýrt og ljóst.

Frá því Lindarhvoll ehf. hóf starfsemi í apríl s.l. hefur sala eigna og greiðsluflæði af stöðugleikaeignum numið alls 34,7 milljörðum króna. Sú aðferðafræði sem beitt hefur verið við sölu þessara eigna hefur verið í fullu samræmi við þær verklagsreglur sem félaginu er gert að starfa eftir.

Sala á hlut og tengdum kröfum í Klakka ehf.

Hvað varðar sölu í Klakka ehf. telur stjórn Lindarhvols ehf. að söluferlið hafi fullnægt og farið að öllu leyti fram eftir ofangreindum reglum. Gagnsæi hafi verið tryggt með því að söluferlið var skýrt og ljóst og jafnræðis bjóðenda hafi að fullu verið gætt:

  • Söluferlið var öllum opið, það var auglýst opinberlega og tilkynning birt á heimasíðu félagsins 29. september síðastliðinn.
  • Öllum áhugasömum fjárfestum var boðið að senda inn skuldbindandi tilboð á því formi og með þeim fyrirvörum sem hentaði hverjum og einum fjárfesti.
  • Söluferlið var eins opið, einfalt og skýrt og mögulegt er í slíku ferli. Það var ekki háð öðrum skilyrðum en þeim að áhugasamir bjóðendur skiluðu inn tilboðum sínum með rafrænum hætti fyrir kl. 16.00, föstudaginn 14. október 2016.
  • Þetta er venjubundið fyrirkomulag í sambærilegum söluferlum en fyrirkomulagið einfaldar tilboðsgerð, auðveldar erlendum sem innlendum aðilum að leggja fram tilboð. Ekki síst er með þeim hætti tryggt að það liggi fyrir rafræn staðfesting þess efnis að tilboð hafi borist fyrir lok tilboðsfrests.
  • Engar athugasemdir bárust varðandi þetta fyrirkomulag fyrir lok tilboðsfrests.

Þrjú tilboð bárust rafrænt fyrir lok tilboðsfrestsins, frá þremur tilboðsgjöfum, á síðustu sex mínútum áður en tilboðsfrestur rann út, sem hér segir:

  • Hæsta tilboðið var að fjárhæð kr. 505.000.161.
  • Næst hæsta tilboðið var að fjárhæð kr. 502.000.000.
  • Þriðja hæsta tilboðið var að fjárhæð kr. 500.950.431.

Þar sem aðili, sem kveðst hafa gert tilboð í fyrrnefnda hluti og tengdar kröfur í Klakka ehf., hefur komið fram í fjölmiðlum er rétt að upplýsa um að nafn hans eða félags í hans eigu eða umsjón var hvorki tilboðsgjafi né kom fram með neinum hætti í þeim tilboðum sem skilað var fyrir lok tilboðsfrests.

Í samræmi við reglur félagsins um sölu eigna fór stjórn Lindarhvols ehf. yfir hvert og eitt tilboð sem barst innan tilboðsfrests.  Stjórn lagði mat á framlögð tilboð á grundvelli þeirra fyrirmæla sem reglur félagsins gera ráð fyrir við slíkt mat. Að matinu loknu tók stjórn Lindarhvols ehf. þá ákvörðun að taka hæsta tilboðinu, sem var frá BLM fjárfestingum ehf. Með sölunni var því að öllu leyti fullnægt því meginmarkmiði við sölu eigna á grundvelli ofangreindra fyrirmæla að leggja eigi áherslu á hagkvæmni með því að leitað skuli hæsta verðs eða markaðsverðs fyrir eignirnar í opnu söluferli.

Strax og afstaða stjórnar Lindarhvols ehf. lá fyrir var þeim aðilum, sem skiluðu inn skuldbindandi tilboðum innan tilboðsfrests, tilkynnt um hvort tilboði viðkomandi yrði tekið eða ekki. Lögð er áhersla á að tilkynna eins fljótt og mögulegt er um niðurstöðu söluferla á heimasíðu félagsins. Tímasetning tilkynningar ræðst af eðli þess söluferlis sem um ræðir. Ræðst það m.a. af hagsmunum félagsins af því að tryggja að endanlegur skuldbindandi samningur liggi fyrir. Niðurstaða söluferlisins var birt með tilkynningu á heimasíðu Lindarhvols þann 11. nóvember sl.

Meðal stöðugleikaeigna sem framseldar voru ríkissjóði voru eignarhlutir í félögum af ýmsum toga.  Stjórn Lindarhvols ehf. telur nauðsynlegt að benda á að umsýsla með slíkum eignum felst meðal annars í því að tilnefna fulltrúa til stjórnarsetu. Það er mat stjórnar Lindarhvols ehf. að um fyllilega samræmanleg hlutverk sé að ræða að sitja í stjórnum fyrir hönd ríkissjóðs og veita jafnframt ráðgjöf um sölu þeirrar eignar. Í báðum tilvikum er viðkomandi að gæta hagsmuna ríkissjóðs og engra annarra.

Stjórn Lindarhvols ehf. tekur allar ákvarðanir varðandi umsýslu, ráðstöfun og sölu einstakra eigna í umsýslu félagsins. Lindarhvoll ehf. hefur ráðið sérfræðinga til að annast ráðgjafastörf og framkvæmd söluferla en aðkoma ráðgjafa við söluferli á eignum í umsýslu félagsins snýr einungis að þeim þáttum að halda utan um söluferlið á hverjum tíma

Stjórn félagsins vill ítreka að við söluferlið var hagsmuna ríkissjóðs gætt í hvívetna, tryggður var fullur trúnaður við söluferlið og farið var eftir reglum Lindarhvols ehf. að öllu leyti.

 

Stjórn Lindarhvols ehf.
Þórhallur Arason, stjórnarformaður
Ása Ólafsdóttir, meðstjórnandi
Haukur C. Benediktsson, meðstjórnandi

Styrkir þú Kjarnann?

Kjarninn reiðir sig á framlög lesenda. Með því að styrkja Kjarnann mánaðarlega tekur þú þátt í að halda úti öflugum fjölmiðli.

Kjarninn hefur verið til taks fyrir kröfuharða lesendur í sjö ár og býður almenningi upp á vandaða umfjöllun þar sem áhersla er á gæði og dýpt.  

Ef þú ert nú þegar styrkjandi leyfum við okkur að benda á að hægt er að óska eftir að hækka styrkinn með því að senda póst á takk@kjarninn.is


Já takk, ég vil styrkja Kjarnann!
Odd Emil Ingebrigtsen, sjávarútvegsráðherra Noregs.
Norski sjávarútvegsráðherrann segir að Samherji sé með „laskað mannorð“
Sjávarútvegsráðherra Noregs segist gruna að Samherji sé að reyna að komast í kringum reglur um eignarhald erlendra aðila á norskum fiskveiðikvóta og hefur gripið til aðgerða. Hann felur ekki neikvæðni sína í garð Samherja.
Kjarninn 9. maí 2021
Jón Gnarr
Af þrælmennum
Kjarninn 9. maí 2021
Borgarstjórar skyldaðir til handabanda
Umræður um handabönd hafa, og það ekki í fyrsta sinn, ratað inn í danska þingið. Þingmenn vilja skylda borgarstjóra landsins til að taka í höndina á nýjum ríkisborgurum, en handabandið er skilyrði ríkisborgararéttar.
Kjarninn 9. maí 2021
Ari
„Vægi loftslagsmálanna minnkar ekki þessa dagana“
Þingmaður VG segir að ef Íslendingar standi við það sem þeir hafa samþykkt af áætlunum um loftslagsmál og geri aðeins betur hafi þeir að minnsta kosti staðið við sinn skerf í málaflokknum.
Kjarninn 8. maí 2021
Brynjar Níelsson, þingmaður Sjálfstæðisflokksins.
Býður sig fram í 2. sæti – stefnir á að verða í framvarðasveit flokksins í Reykjavík
Brynjar Níelsson ætlar að bjóða fram krafta sína fyrir Sjálfstæðisflokkinn fyrir næstu kosningar en hann hefur verið á þingi síðan 2013.
Kjarninn 8. maí 2021
Nichole Leigh Mosty
Ég vil tala um innflytjendur
Leslistinn 8. maí 2021
Jón Sigurðsson
Ein uppsprettulind mennskunnar
Kjarninn 8. maí 2021
Þorsteinn Már Baldvinsson, forstjóri Samherja, er einn þeirra sex sem eru með stöðu sakbornings í rannsókn héraðssaksóknara á viðskiptaháttum fyrirtækisins.
Fjallað um rannsókn á Samherja í skráningarlýsingu Síldarvinnslunnar
Hlutafjárútboð Síldarvinnslunnar hefst á mánudag. Á meðal þeirra sem ætla að selja hlut í útgerðinni í því er Samherji, sem verður þó áfram stærsti eigandi Síldarvinnslunnar. Fjallað er um rannsókn yfirvalda á Samherja í skráningarlýsingu.
Kjarninn 8. maí 2021
Meira úr sama flokkiInnlent
None