Forsvarsmenn Íslandsbanka hafa gengið úr skugga um að gögn um verðbréfaviðskipti dómara við Hæstarétt hafi lekið frá bankanum. Innri endurskoðun bankans rannsakaði málið og niðurstaðan er sú að ekkert bendi til þess að gögnin hafi borist fjölmiðlum frá Íslandsbanka eða starfsmönnum hans.
Í tilkynningu frá bankanum segir að gögnin sem hafi verið til umfjöllunar í Kastljósi á dögunum hafi öll verið gömul og eigi „rót að rekja úr starfsemi Glitnis banka hf. fyrir hrun“. Eins og kunnugt er varð Glitnir að Íslandsbanka eftir efnahagshrunið 2008.
Bankinn mun jafnframt óska eftir að lögreglurannsókn verði gerð á því eftir hvaða leiðum gögnin hafi komist í hendur fjölmiðla eða þeirra sem láku þeim til fjölmiðla.
Steinunn Guðbjartsdóttir, fyrrverandi formaður slitastjórnar Glitnis, sagði við Kjarnann 6. desember að það væri af og frá að gögn sem sýndu viðskipti hæstaréttardómara með hlutabréf í Glitni hafi komið frá slitastjórninni. „Þetta kemur ekki frá okkur. Ég hef aldrei séð þessi gögn.“
Samkvæmt upplýsingum Kjarnans voru gögn um viðskipti hæstaréttardómara aldrei hluti af þeim málum sem rannsökuð hafa verið af embætti héraðssaksóknara, áður sérstaks saksóknara, vegna gjörninga sem áttu sér stað innan Glitnis. Því eru gögnin ekki komin þaðan heldur né eru þau hluti af málsgögnun sem lögð hafa verið fram í sakamálum sem höfðuð hafa verið vegna þeirra rannsókna.
Greint var frá því í fréttum Stöðvar 2 og í Kastljósi 5. desember að Markús Sigurbjörnsson, forseti Hæstaréttar, hefði átt hlutabréf í Glitni fyrir hrun og síðar fjárfest um 60 milljónum króna í verðbréfasjóði í rekstri Glitnis. Í Kastljósi var enn fremur greint frá því að Ólafur Börkur Þorvaldsson, sem gegnt hefur embætti hæstaréttardómara frá árinu 2003, hafi einnig átt hlutabréf í Glitni um tíma á árinu 2007. Hann seldi bréf sín í lok þess árs og fjárfesti í verðbréfasjóði innan Glitnis. Í Fréttablaðinu í morgun var svo sagt frá því að hæstaréttardómararnir Eiríkur Tómasson, Ingveldur Einarsdóttir og Árni Kolbeinsson, sem nú er hættur störfum, hafi einnig öll átt hlutabréf í Glitni á árunum 2007 og 2008. Allir dómararnir fimm hafa dæmt í málum sem tengjast Glitni, bæði fyrir og eftir hrun. Þar á meðal eru sakamál gegn starfsmönnum eignastýringar Glitnis. Dómararnir lýstu ekki yfir vanhæfi í neinu þeirra mála.
Gögnin sem birt voru sýndu samskipti Markúsar við eignastýringu Glitnis. Á meðal þeirra voru tölvupóstar og skjöl sem hann undirritaði til að veita heimild til fjárfestingar. Gögnin eru bundin bankaleynd og alls ekki aðgengileg mörgum. Starfsmenn slitastjórnar Glitnis eftir hrun hafa þó mögulega getað flett þeim upp í kerfum bankans auk þess sem starfsmenn eignastýringar Glitnis fyrir hrun gátu nálgast þau.
Markús sendi frá sér yfirlýsingu daginn eftir þar sem hann segist hafa tilkynnt nefnd um dómarastörf um sölu á hlutabréfum í sinni eigu þegar viðskiptin áttu sér stað, og hann hafi fengið leyfi nefndarinnar þegar honum áskotnuðust þau. Hann hafi hins vegar ekki þurft að tilkynna um hvernig hann ráðstafaði peningunum eftir söluna.
Á miðvikudag tilkynnti Hæstiréttur að frá byrjun árs 2017 verði upplýsingar um hagsmunatengsl hæstaréttardómara aðgengilegar á heimasíðu réttarins.
