Alþýðusamband Íslands hefur ákveðið að segja ekki upp núgildandi kjarasamningi á almennum vinnumarkaði. Þetta kemur fram í tilkynningu á vef ASÍ að undangengnum fundarhöldum í baklandi stéttarfélaganna.
Samninganefndir ASÍ og Samtaka Atvinnulífsins funduðu í dag vegna endurskoðunar kjarasamninga og mátu forsendur kjarasamninganna enda er síðasti dagur í dag til að endurskoða kjarasamninganna, fram á næsta ár.
Að mati forsendunefndar ASÍ og SA standa tvær forsendanna enn, en ein er brostin. Sú sem er brostin að mati nefndarinnar er „mat á því hvort sú launastefna og þær launahækkanir sem í samningnum fólust hafi verið stefnumarkandi fyrir aðra á vinnumarkaði (32% hækkun frá nóv 2013-des 2018).“
Tilkynning ASÍ í heild sinni:
„Niðurstaða forsendunefndar ASÍ og SA vegna endurskoðunar kjarasamninga er að tvær af þremur forsendum standast en ein gerir það ekki. Sú snýst um launaþróun annarra hópa. Samninganefnd ASÍ hefur engu að síður, m.a. að undangengnum fundarhöldum í baklandi stéttarfélaganna, ákveðið að segja ekki upp núgildandi kjarasamningi.
Forsendurnar sem voru til skoðunar eru þessar:
- Fjármögnun stjórnvalda á stofnframlögum ríkisins til 2.300 almennra íbúða á árunum 2016-2019 eða að hámarki 600 á ári.
- Mat á því hvort sú launastefna og þær launahækkanir sem í samningnum fólust hafi verið stefnumarkandi fyrir aðra á vinnumarkaði (32% hækkun frá nóv 2013-des 2018).
- Aukinn kaupmáttur á samningstímanum.
Ljóst er að liðir 1 og 3 standast skoðun en liður 2 er forsendubrestur eins og áður segir. Er það mat samninganefndar ASÍ að ákveðin verðmæti séu í núgildandi samningi (4,5% almenn launahækkun 1. maí og hækkun á mótframlagi atvinnurekenda í lífeyrissjóð um 1,5% 1. júlí) auk þess sem lítill áhugi er á því að almenni markaðurinn fari fyrstur í þeim kjaraviðræðum sem framundan eru, en mörg opinberu félaganna eru með lausa samninga síðar á þessu ári.“
Tvöföldun stofnframlaga
Líkt og fram kom hér að framan var eitt atriðanna sem var til skoðunar fjármögnun stjórnvalda á stofnframlögum ríkisins til 2.300 almennra íbúða. Á fundi sem forsvarsmenn ASÍ héldu með ráðherrum úr ríkisstjórninni í síðustu viku var kallað skýrt eftir efndum í húsnæðismálum. Ekkert væri fyrirsjáanlegt um slíkar í fjármálaáætlun ríkisstjórnarinnar né fjárlögum ársins 2017.
Samþykkt var svo á fundi ríkisstjórnarinnar síðastliðinn föstudag að tvöfalda stofnframlög úr ríkissjóði inn í þennan málaflokk. „Á fjárlögum ársins 2017 eru 1.500 milljónir merktar til stofnstyrkja inn í almenna íbúðarkerfið. Við munum tryggja allt að 1.500 milljónum króna til viðbótar inn í það kerfi. Það var samþykkt í ríkisstjórn í dag þannig að þetta verða allt að þrír milljarðar króna sem fara í stofnframlög inn í þennan málaflokk á þessu ári,“ sagði Þorsteinn Víglundsson, félags- og jafnréttismálaráðherra, við Kjarnann á föstudag.
