Sex eru látnir og að minnsta kosti 48 eru særðir eftir hryðju­verka­árás í London í gær­kvöldi. Nokkrir eru alvar­lega slas­að­ir. 

Hvítum sendi­ferða­bíl var ekið á gang­andi veg­far­endur á Lund­úna­brúnni um klukkan tíu í gær­kvöldi, og svo hlupu þrír menn út úr bílnum og stungu fólk með hníf­um. Að sögn lög­reglu voru menn­irnir þrír klæddir gervi­sprengju­vest­um. Menn­irnir voru allir skotnir til bana af lög­reglu í gær­kvöldi, átta mín­útum eftir að henni hafði fyrst verið gert við­vart um árás­ina. 

Lög­regla óskar nú eftir því að fólk sem gæti átt myndir eða mynd­skeið af mönn­unum þremur afhendi efn­ið. Þá hefur verið greint frá því að lög­reglu­eft­ir­lit verði aukið næstu daga, en á fimmtu­dag fara fram þing­kosn­ingar í Bret­land­i. 

Sadiq Khan, borg­ar­stjór­inn í London, sagði í yfir­lýs­ingu í nótt að þetta væri heig­uls­leg árás á sak­lausa borg­ara og ferða­menn sem hafi verið að njóta borg­ar­innar á laug­ar­dags­kvöldi. Hann for­dæmdi árás­ina. Það gerði Ther­esa May for­sæt­is­ráð­herra lík­a. 

Í kvöld eiga að fara fram minn­ing­ar- og styrkt­ar­tón­leikar fyrir fórn­ar­lömb hryðju­verks­ins í Manchester, þar sem 22 lét­ust á dög­unum eftir tón­leika með Ariönu Grande. Tón­leik­arnir munu fara fram þrátt fyrir árás­irnar í London. 

Sendi­ráð Íslands í London fylgist með atburð­unum og biður Íslend­inga í London um að láta vita af sér.