Smári McCarthy, þing­maður Pírata, segir að marg­faldur þjófn­aður sé að eiga sér stað á grund­velli gall­aðs stöð­ug­leika­samn­ings milli rík­is­ins og Kaup­þings, stærsta eig­anda Arion banka. Þessi samn­ingur hafi verið skrif­aður af „manni sem núna situr hinum megin borðs­ins,“ en þar vísar Smári til Bene­dikts Gísla­son­ar, ráð­gjafa Kaup­þings við sölu Arion banka. Þetta kom fram í máli Smára í sér­stakri umræðu um Arion banka, sem fór fram á Alþingi síð­deg­is.

Hann hefur lagt fram frum­varp sem á að tak­marka útgreiðslur arðs frá fjár­mála­fyr­ir­tækjum við reiðufé í upp­gjörs­mynt fyr­ir­tæk­is­ins. Frum­varp­inu var dreift á þriðju­dag.

Í umræð­unni í dag sagði Smári að lengi hefði margan grunað að eitt­hvað mis­jafnt væri í gangi með Arion banka. Leynd hafi ríkt yfir stöð­ug­leika­samn­ing­um, leynd hefði ríkt yfir hverjir væru raun­veru­legir eig­endur Arion banka og skortur á gagn­sæi ali á tor­tryggni og leynd­ar­hyggju sem dragi úr getu sam­fé­lags­ins til að upp­ræta inn­an­mein.

Smári sagði að Píratar hefðu legið yfir mál­inu og sú vinna hefði skilað því að áhyggjur þeirra bein­ist að hætt­unni á eignaund­anskot­um, eða „tunn­elovani“ á tékk­nesku. „Hug­takið var fundið upp þar á tímum komm­ún­ism­ans, þegar slíkt var dag­legt brauð. Um er að ræða flutn­ing á eignum eða hagn­aði út úr fyr­ir­tækjum í þágu meiri­hluta­eig­enda fyr­ir­tæk­is­ins, á kostnað minni­hluta­eig­enda og skatt­yf­ir­valda.“

Að sögn Smára hafa Píratar fundið galla í stöð­ug­leika­samn­ingi Kaup­þings frá árinu 2015 sem megi nýta sér til að að hola Arion banka að inn­an. Það sé hægt með því að greiða sér út arð í formi óskráðra hluta­bréfa og skulda­bréfa í eigu Arion banka. T.d. með bréfum í Valitor, sem er dótt­ur­fé­lag Arion banka. „þegar sölu­verð­mæti bank­ans er orðið nægi­lega lítið mun eng­inn sölu­hagn­aður vera til skipt­anna - ríkið fær þá ekk­ert í sinn hlut. Fleiri fjár­mála­fyr­ir­tæki sjá sér leik á borði eins og fréttir bera með sér um að VÍS hygg­ist greiða út arð í Kviku­hluta­bréf­um, en Kvika sér um útboð Arion. Skyldi það vera til­vilj­un?“

Þetta segir Smári að sé marg­faldur þjófn­aður frá almenn­ingi á grund­velli gall­aðs samn­ings. Hann hafi auk þess verið skrif­aður af manni sem núna sitji hinum megin borðs­ins. Sá máður sem Smári vísar til er Bene­dikt Gísla­son, sem var lyk­il­maður í fram­kvæmd­ar­hópi um afnám hafta og kom að gerð stöð­ug­leika­samn­inga við kröfu­hafa föllnu bank­anna. Hann starfar nú sem ráð­gjafi Kaup­þings. Kjarn­inn fjall­aði ítar­lega um Bene­dikt í síð­asta mán­uði.

Smári segir að til að tryggja að hags­munir kröfu­hafa svo sem líf­eyr­is­sjóða, minni­hluta­eig­enda og skatt­yf­ir­valda verði ekki fyrir borð bornir þurfi að skil­yrða í lögum um að arður fari fram í reiðufé en ekki í eign­unum félags­ins. Því hafi hann lagt fram áður­nefnt frum­varp. Það sé algjört grund­vall­ar­at­riði að hans mati að það nái fram að ganga.