Aðalmeðferð fer fram í máli Hreiðars Más Sigurðssonar, fyrrverandi forstjóra Kaupþings, gegn íslenska ríkinu í Héraðsdómi Reykjavíkur í dag. Hreiðar Már stefndi ríkinu til greiðslu miskabóta vegna þess sem hann telur vera spilling embættismanna.
Telur Hreiðar að embætti sérstaks saksóknara hafi brotið á sér í tengslum við hleranir á síma hans á árinu 2010. Í aðsendri grein í Fréttablaðinu þegar málið var þingfest í desember 2016 sagði Hreiðar: „Á árinu 2010 braut Embætti sérstaks saksóknara lög þegar farsími minn var hleraður þrátt fyrir að ég hafi verið ný kominn úr yfirheyrslum þar sem ég hafði rétt til að svara ekki spurningum sem beint var til mín. Til að bíta höfuðið af skömminni þá hleruðu starfsmenn Embættis sérstaks saksóknara einnig samtöl mín við lögmann minn þar sem við ræddum mál þar sem rannsókn beindist gegn mér. Það er heilagur réttur sakaðs manns að geta leitað sér ráðgjafar lögmanns í trúnaði.“
Hreiðar heldur því fram að Ólafur Þór Hauksson sérstakur saksóknari hafi á sínum tíma valið að leita til Héraðsdóms Vesturlands til að fá heimildir til hlerunar, sérstaklega vegna tenginga hans við eina dómara réttarins, Benedikt Bogason sem nú er Hæstaréttardómari. Ólafur var sýslumaður á Vesturlandi áður en hann varð sérstakur saksóknari, þannig að gera má ráð fyrir að leiðir þeirra Benedikts hafi ægi oft legið saman.
Undir rekstri dómsmála sem hafa verið höfðuð á hendur mér hefur komið fram í vitnisburði fyrrum lögreglumanns hjá Embætti sérstaks saksóknara að Benedikt Bogason dómari skáldaði upp þinghald og falsaði skjal þess efnis þegar hann útvegaði lögreglumönnum Embættis sérstaks saksóknara hlerunarúrskurðinn. Ekkert þinghald var haldið, engin gögn voru lögð fram, dómarinn lagði ekkert sjálfstætt mat á hvort nauðsyn væri að hlera símtöl mín og ekkert vitni var að þinghaldinu eins og lög kveða á um,“ sagði Hreiðar Már í greininni í Fréttablaðinu.
Sýndarþinghald
Lögreglumaður þessi bar vitni fyrir dómstólnum í dag. Jón Óttar Ólafsson er fyrrverandi lögreglumaður við embætti sérstaks saksóknara. Jón hefur lýst því yfir í fjölmiðlum og fyrir rétti áður að lögreglan hafi hlerað samtöl sakborninga við verjendur sína og ítrekaði það í framburði sínum í dag. Hann sagðist hafa hlustað á Sigurð Einarsson fyrrverandi stjórnarformann Kaupþings ræða við verjanda sinn en sagðist ekki hafa hlustað á Hreiðar sjálfan ræða við sinn verjanda.
Jón Óttar sagði frá því þegar hann fór heim til Benedikts að sækja hlerunarúrskurð sem heimilaði lögreglunni að hlera síma Hreiðars eftir að hann losnaði úr gæsluvarðhaldi á árinu 2010. Jón, sem er aðal vitni til stuðnings kröfu Hreiðars í þessu máli, vill meina að þar hafi í raun sýndarþinghald verið haldið. Hann hafi ásamt öðrum lögreglumanni sótt skjalið á heimili dómarans, sem hafi skrifað fyrir þá úrskurðarorð á staðnum, prentað út og stimplað. Hlerunin á síma Hreiðars hófst stuttu seinna.
„Það er verið að loka gatinu. Þetta þarf að vera til, þessi gögn. Það þarf að setja úrskurð inn í málsgögnin,“ sagði Jón Óttar.
Starfsmenn dómstólsins tengdust Kaupþingi
Benedikt Bogason Hæstaréttardómari kom sjálfur og bar vitni í dag. Dómarinn stendur í stórræðum fyrir dómstólum um þessari mundir en auk þess að vera einn af helstu persónum og leikendum í þessu máli hefur hann stefnt fyrrverandi kollega sínum, Jóni Steinari Gunnlaugssyni, fyrir meiðyrði.
Benedikt sagði að Ólafur hafi haft samband við hann árið 2010 til að fara fram á umrædda rannsóknarúrskurði. Hann sagði ástæðuna fyrir því að leitað hafi verið til hans sem dómara hjá Héraðsdómi Vesturlands vera þá að málaskráakerfi dómstólsins í Reykjavík væri með þeim hætti að það sé opið öllum starfsmönnum. Í þessu máli hafi verið mjög mikilvægt að ekkert spyrðist út um þessar rannsóknaraðgerðir. Benedikt sagði að nærvera tiltekinna starfsmanna við Héraðsdóm Reykjavíkur, sem tengdust Kaupþingi, hefðu orðið þess valdandi að ákveðið hafi verið að leita til dómstólsins fyrir vestan og hann taldi þessar skýringar málefnalegar.
Hann rifjaði upp að hafa hitt Ólaf Þór saksóknara í óformlegu þinghaldi vegna málsins. Ólafur hafi ekki getað beðið eftir úrskurðinum og því hafi lögreglan sótt hann síðar um daginn. Benedikt mundi aðeins eftir öðrum lögreglumanninum á heimili sínu, ekki Jóni Óttari. Hann sagði þó það langt um liðið að hann gæti alls ekki útilokað að þeir hafi verið tveir. Heimsóknin hafi verið örstutt, bara örfáar mínútur.
Benedikt vísaði að öðru leyti öllum vitnisburði Jóns Óttars, og þannig kröfum Hreiðars, á bug og sagði frásögnina eins og hún birtist í stefnunni vera tilhæfulausa.
