Skúli Mog­en­sen segir WOW air ætla að safna um 200 til 300 millj­ónum doll­ara, eða 22 til 33 millj­örðum íslenskra króna, í nýtt hlutafé í hluta­fjár­út­boði sem fyr­ir­tækið ætlar að ráð­ast í á næstu tveimur árum. Þetta segir Skúli, for­stjóri fyr­ir­tæk­is­ins, í sam­tali við Fin­ancial Times. Skúli ætlar að selja tæp­lega helm­ing fyr­ir­tæk­is­ins, án þess þó að nefna heild­ar­verð­mæti flug­fé­lags­ins.

F­in­ancial Times greinir frá því að síð­ustu tvö rekstr­arár hafi reynst WOW air erf­ið­lega, fyri­tækið hafi tapað 26,5 millj­ónum doll­ara, eða þremur millj­örðum íslenskra króna, fyrir skatt í fyrra og gert ráð fyrir að tap þessa árs muni nema sex millj­ónum doll­ara eða um 600 millj­ónum króna. Von­ast sé til þess að á næsta ári muni fyr­ir­tækið hins vegar skila hagn­aði.

Skúli segir að WOW air hafi ekki tek­ist að tak­marka kostnað félags­ins, hækkun elds­neyt­is­verðs hafi unnið gegn þeim og WOW sé ekki með varnir gegn hækk­unum sem hann vill end­ur­skoða. Í frétt Fin­ancial Times segir að olíu­verð hafi hækkað umtals­vert á liðnum mán­uð­um, tunnan hafi verið á 92 doll­ara í lok ágúst og hækkað um 25 pró­sent á einum árs­fjórð­ungi. Önnur flug­fé­lög víðs vegar í heim­inum hafi hins vegar skilað met­hagn­aði árið 2017, þvert á stöð­una hjá WOW air.

WOW air sendi fyrir helgi frá sér til­kynn­ingu þar sem sagði að skulda­bréfa­út­boði félags­ins muni ljúka á morg­un. Gefin verða út skulda­bréf fyrir minst 50 millj­ónir evra, eða rúma 6 millj­arða króna.