365 miðlar hefur selt 10,92 pró­sent hlut sinn í Sýn sem félagið fékk þegar það seldi ljós­vaka- og fjar­skipta­starf­semi sína til Sýnar í lok síð­asta árs. Sölu­verðið er um tveir millj­arðar króna. Frá þessu er greint á vef Frétta­blaðs­ins en eig­endur þess mið­ils eru 365 miðl­ar. Eig­andi félags­ins er Ingi­björg Pálma­dóttir og félag­inu er einnig stýrt af eig­in­manni henn­ar, Jóni Ásgeiri Jóhann­essyni.

Í frétt Frétta­blaðs­ins segir að í 365 miðlar hafi í staðin keypt ríf­lega þriggja pró­senta hlut í Högum og greitt fyrir það tæp­lega 1,8 millj­arða króna. Félög Ingi­bjargar áttu fyrir meira en tveggja pró­senta hlut í Hög­um. Frétta­blaðið segir að þau kaup hafi verið fjár­mögnuð af Kviku banka.

Þurfa ekki að selja Frétta­blaðið lengur

Greint hefur verið frá því að und­an­förnu að Kvika banki sé að reyna að selja Frétta­blaðið fyrir hönd hjón­anna. Þetta er meðal ann­ars vegna skil­yrða sem Sam­keppn­is­eft­ir­litið setti þegar eig­end­­urnir seldu ofan­greindir eignir til Sýnar í fyrra. 

Þá fékk eig­and­inn, 365 mið­l­­ar, 30 mán­uði, frá og með 8. októ­ber 2017, til að selja annað hvort Frétta­­blaðið eða hlut sem hann fékk afhentan í Sýn, fjar­­skipta- og fjöl­miðla­­fyr­ir­tækis sem skráð er á mark­að.

Nú er ljóst að 365 miðlar hefur selt hlut sinn í Sýn og getur þar með átt Frétta­blaðið og tengda miðla áfram.

Hagar áður í eigu Baugs­fjöl­skyld­unnar

Hagar er stærsta smá­sölu­fyr­ir­tæki á Íslandi. Krúnu­djásn félags­ins eru Bón­usversl­an­irn­ar, sem eru með stærstu mark­aðs­hlut­deild í dag­vöru á Íslandi. Jón Ásgeir og faðir hans Jóhannes Jóns­son stofn­uðu Bónus árið 1989 en misstu Haga úr höndum eftir hrunið og gjald­þrot Baugs Group, fjár­fest­inga­fé­lags fjöl­skyld­unn­ar.

Kjarn­inn fjall­aði ítar­lega um end­ur­komu hjón­anna inn í hlut­hafa­hóp Haga í frétta­skýr­ingu fyrir tæpum tveimur árum síð­an. Hana má lesa hér.