Sýklalyfjanotkun Íslendinga jókst um rúmlega 3 prósent á síðasta ári miðað við árið áður en sýklalyfjanotkun hjá dýrum var áfram ein sú minnsta hér á landi miðað við önnur Evrópulönd. Þetta kemur fram í nýrri árlegri skýrslu um sýklalyfjanotkun og algengi sýklalyfjaónæmra baktería á Íslandi hjá mönnum og dýrum.
Í frétt Embættis landlæknis um málið segir að þetta valdi ákveðnum vonbrigðum því á sama tíma minnkaði sýklalyfjanotkun hjá mönnum á hinum Norðurlöndunum. Athygli veki minnkandi notkun sýklalyfja hjá börnum yngri en 5 ára en hins vegar jókst notkunin hjá einstaklingum 65 ára og eldri.
Sýklalyfjaónæmi er áfram fremur lágt á Íslandi miðað við nágrannaþjóðirnar og var það að mestu óbreytt miðað við árið 2016.
Mælt með eftirliti á sýklalyfjaónæmum bakteríum í matvælum
Í apríl 2017 skilaði starfshópur heilbrigðisráðherra skýrslu um aðgerðir gegn útbreiðslu sýklalyfjaónæmis. Starfshópurinn lagði til tíu tillögur sem nauðsynlegar væru í baráttunni gegn sýklalyfjaónæmi. Þar á meðal voru tillögur um hvernig hægt væri að draga úr sýklalyfjanotkun hjá mönnum og mælt var með eftirliti á sýklalyfjaónæmum bakteríum í erlendum og innlendum matvælum.
Á árinu 2018 hófst vinna með læknum sem miðar að því að efla vitund lækna um bættar ávísanavenjur sýklalyfja. Embætti landlæknis vonast til að þetta muni leiða til minnkandi notkunar. Einnig var aukið eftirlit með sýklalyfjaónæmum bakteríum í matvælum og rannsóknir á eðli dreifingar sýklalyfjaónæmis efldar. „Vonandi munu allir þessir þættir reynast gagnlegir í baráttunni við útbreiðslu sýklalyfjaónæmra baktería sem álitin er vera ein helsta heilbrigðisógn samtímans,“ segir í frétt Embættis landlæknis.
