Skúli veðsetti heimili sitt fyrir 358 milljónir í september

Skúli Mogensen, eigandi WOW air, veðsetti heimili sitt, hótel á Suðurnesjum og fasteignir í Hvalfirði fyrir lánum frá Arion banka í september síðastliðnum. Um er að ræða tæplega 733 milljónir króna á tveimur tryggingabréfum.

Ritstjórn Kjarnans 7. desember 2018

Skúli Mogensen, eigandi WOW air, veðsetti heimili sitt, hótel á Suðurnesjum og fasteignir í Hvalfirði fyrir lánum frá Arion banka. Samtals er um að ræða 733 milljónir króna á tveimur tryggingabréfum sem Arion banki þinglýsti á fasteignir tengdum Skúla í september síðastliðnum. Þetta kemur fram í umfjöllun Stundarinnar í dag.

Veðsetti húsið sitt fyrir nærri 360 milljónir

Tryggingabréfinu var bæði þinglýst á eignir sem tengjast rekstri WOW air með óbeinum hætti, á hótel á Suðurnesjum sem félagið TF-KEF ehf. á, og eins á fasteignir í Hvammsvík í Hvalfirði sem Skúli Mogensen á í gegnum félagið Kotasælu ehf.. Tryggingabréfið á hótelinu á Suðurnesjum er á þriðja veðrétti á eftir tveimur tryggingabréfum frá Arion upp á samtals 650 milljónir króna sem hvíla á fyrsta og öðrum veðrétti, samkvæmt umfjöllun Stundarinnar.

Arion banki þinglýsti einnig nýju tryggingabréfi upp á 2,77 milljónir evra, 358 milljónir króna, á heimili Skúla á Seltjarnarnesi sama dag. Engin veðbönd hvíldu á húsinu fyrir þetta.

Samtals er því um að ræða tæplega 5,7 milljónir evra, 733 milljónir króna, á tveimur tryggingabréfum sem Arion banki þinglýsti á fasteignir tengdar Skúla í september.

Skúli fjárfesti 770 milljónir í skuldabréfaútboði WOW air

Í september 2018 stóð WOW air í skuldabréfaútboði í þeirri von að tryggja áframhaldi rekstur flugfélagsins. Þremur dögum áður en Skúli Mogensen undirritaði tryggingarbréfin á fasteignunum lauk skuldabréfaútboðinu.

Skúli tilkynnti skuldabréfahöfum WOW air í nóvember að hann hefði sjálfur fjárfest í skuldabréfaútboðinu fyrir 770 milljónir króna. Það var 1/12 af því sem safnaðist í útboðinu en alls söfnuðust 60 milljónir evra til að endurfjármagna WOW air að hluta.

Ekki fékkst svar frá Arion banka

Stundin hafði samband við Arion banka til að spyrjast fyrir um málið og hvort bankinn hefði veitt ný lán til Skúla á þessum tíma eða hvort bankinn hefði verið að taka frekari veð, og þar með tryggja stöðu, gagnvart Skúla á WOW air á þessum tíma. Í svari frá bankanum sagði að bankaleynd kæmi í veg fyrir að Arion gæti tjáð sig um viðskipti sín við viðskiptavini bankans. Stundin spurði Skúla Mogensen einnig að því hvort hann hefði fjármagnað þátttöku sína í skuldabréfaútboðinu með láni frá Arion banka. Skúli svaraði ekki fyrirspurn blaðsins, sem send var í tölvupósti.

Við þurfum á þínu framlagi að halda

Þú getur tekið beinan þátt í að halda úti öflugum fjölmiðli.

Við sem vinnum á ritstjórn Kjarnans viljum hvetja þig til að vera með okkur í liði og leggja okkar góða fjölmiðli til mánaðarlegt framlag svo við getum haldið áfram að vinna fyrir lesendur, fyrir fólkið í landinu.

Kjarninn varð níu ára í sumar. Þegar hann hóf að taka við frjálsum framlögum þá varð slagorðið „Frjáls fjölmiðill fyrir andvirði kaffibolla“ til og lesendur voru hvattir til að leggja fram í það minnsta upphæð eins kaffibolla á mánuði.

Mikið vatn hefur runnið til sjávar á þeim níu árum sem Kjarninn hefur lifað. Í huga okkar á Kjarnanum hefur þörfin fyrir fjölmiðla sem veita raunverulegt aðhald og taka hlutverk sitt alvarlega aukist til muna.

Við trúum því að Kjarninn skipti máli fyrir samfélagið.

Við trúum því að sjálfstæð og vönduð blaðamennska skipti máli.

Ef þú trúir því sama þá endilega hugsaðu hvort Kjarninn er ekki allavega nokkurra kaffibolla virði á mánuði.

Vertu með okkur í liði. Þitt framlag skiptir máli.

Ritstjórn Kjarnans: Sunna Ósk Logadóttir, Þórður Snær Júlíusson, Erla María Markúsdóttir, Arnar Þór Ingólfsson, Eyrún Magnúsdóttir og Grétar Þór Sigurðsson.

Já takk, ég vil styrkja Kjarnann!

Orðafjöldi: 441 Færslan var síðast uppfærð: 7. desember 2018, kl. 9:56
Færslan birtist fyrst: 7. desember 2018, kl. 9:22

Fréttinni hefur verið breytt en ranglega var greint frá því að samtals hefði verið um að ræða 733 milljónir evra á tveimur tryggingabréfum sem Arion banki þinglýsti á fasteignir tengdum Skúla í september síðastliðnum. Hið rétta er að um krónur var að ræða, ekki evrur. Beðist er velvirðingar á þessum mistökum.