Alþingi stendur nú fyrir rannsókn á starfsumhverfi og vinnustaðamenningu Alþingis með sérstakri áherslu á einelti, kynferðislega og kynbundna áreitni. Þetta kemur fram í tilkynningu á vef Alþingis.
Samkvæmt tilkynningunni hefur Félagsvísindastofnun umsjón með rannsókninni. Um er að ræða netkönnun með spurningum bæði til þingmanna og starfsmanna sem tekur mið af rannsókn Alþjóðaþingmannasambandsins (IPU) og Evrópuráðsþingsins (PACE) á kynferðislegri áreitni og ofbeldi á evrópskum þjóðþingum og verða niðurstöður því að hluta til samanburðarhæfar, samkvæmt Alþingi.
Í þeirri rannsókn kom meðal annars fram að 85 prósent þingkvenna í 45 löndum Evrópu hefðu verið beittar kynferðislegu ofbeldi, áreitni og kynjamisrétti í vinnunni. Rannsóknin náði til 123 kvenna og voru tekin viðtöl við allar konurnar.
Kortleggja umfang ofbeldishegðunar á þjóðþingum Evrópu
Þá verður jafnframt nýleg rannsókn sem Félagsvísindastofnun vann fyrir velferðarráðuneytið á íslenskum vinnumarkaði, Valdbeiting á vinnustað, höfð til hliðsjónar og samanburðar.
Könnunin er, samkvæmt tilkynningu Alþingis, þannig þáttur í því ferli að kortleggja umfang ofbeldishegðunar – svo sem eineltis, kynferðislegrar og kynbundinnar áreitni – á þjóðþingum Evrópu, en hún er einnig til að afla almennra upplýsinga um Alþingi sem vinnustað og sameiginlegt starfsumhverfi þingmanna og starfsmanna.
Starfsmenn og þingmenn hafa fengið bréf frá forseta Alþingis með hvatningu til að taka þátt í könnuninni, þar sem bent er á að góð svörun auki verulega gæði könnunarinnar og gagnsemi.
