Don­ald Trump, for­seti Banda­ríkj­anna, lýsti rétt í þessu yfir neyð­ar­á­standi í land­inu. Sú aðgerð, sem er hugsuð sem örþrifa­ráð sem hægt er að grípa til vegna nátt­úr­ham­fara, far­sótta eða stríða, veitir aðgang að um 50 millj­örðum Banda­ríkja­dala til að berj­ast við útbreiðslu veirunnar sem veldur COVID-19 sjúk­dómn­um. 

Eins og er hafa yfir 1.800 til­felli greinst í Banda­ríkj­un­um, alls í 46 ríkj­um, og 41 hafa lát­ist. Banda­ríkja­stjórn hefur legið undir ámæli fyrir að bregð­ast seint við ástand­inu og Trump gerði ítrekað lítið úr stöð­unni á síð­ustu vik­um. Þetta er í fyrsta sinn sem Trump talar um veiruna og útbreiðslu hennar sem vanda­mál innan Band­arikj­anna, en ekki ein­ungis vágest sem þurfi að halda utan landamæra lands­ins.

Á blaða­manna­fundi sem Trump boð­aði til í dag og hófst rúm­lega hálf átta að íslenskum tíma fór hann yfir allar þær aðgerðir sem hann og rík­is­stjórn hans hefðu gripið til og sagði að þær hefðu bjargað fjöl­mörgum manns­líf­um. Hann neit­aði að taka ábyrgð á því að illa hefur gengið að hefja víð­tækar próf­anir á því hvort að Banda­ríkja­menn væru sýktir af veirunni og sagði að ástæðan fyrir töf­unum hefði verið kerf­is­legur galli. Hans fólk væri búið að end­ur­hanna kerfið hratt og nú væru próf­anir að kom­ast í rétt horf.

Á fund­inum sagði Banda­ríkja­for­seti að hann væri búinn að fyr­ir­skipa öllum ríkjum lands­ins að setja í gang neyð­ar­að­gerðir og veitti heil­brigð­is­mála­ráð­herra lands­ins, Alex Azar, víð­tækar heim­ildir til að gera læknum og spít­ölum kleift að bregð­ast hart við veirunni og afleið­ingum henn­ar.

Á meðal þess sem hann minnt­ist á var ákvörðun um að setja ferða­bann á Kína og svo ferða­bannið sem hann ákvað að setja á Evr­ópu og tekur gildi á mið­nætti. Sagði hann að bannið hefði þegar skilað gríð­ar­legum árangri, þrátt fyrir að það hefði ekki enn tekið gildi.

Trump sagði að ekk­ert ríkið væri betur í stakk búið til að takast á við útbreiðslu veirunnar og að ekk­ert ríki væri að gera meira til þess að hefta úbreiðsl­una henn­ar. Auk þess væru Banda­ríkin að hjálpa öðrum ríkjum í þeirra bar­áttu við far­ald­ur­inn. 

Með Trump á blaða­manna­fund­inum í dag voru meðal ann­ars stjórn­endur frá stórum banda­rískum lyfja­fyr­ir­tækjum og stærstu dag­vöru­versl­unum Banda­ríkj­anna, á borð við Wall­mart og Target.

Don­ald Trump Banda­­ríkja­­for­­seti til­­kynnti aðfara­nótt fimmtu­dags að ferð­u­m frá Evr­­ópu­löndum utan Bret­lands til Banda­­ríkj­anna yrði aflýst í þrjá­­tíu daga. Hann sagði Evr­­ópu­­sam­­band­inu hafa mis­­­tek­ist að hefta útbreiðsl­una. Yfir­­völd í Banda­­ríkj­unum hafi hins vegar brugð­ist hratt við og að til­­­felli nýju kór­ón­u­veirunnar þar í landi væru fá miðað við í Evr­­ópu. Að­­gerð­­irnar væru „harðar en nauð­­syn­­leg­­ar“.

Síðan þá hefur staðan versnað hratt í Banda­ríkj­unum og leitt til þess að neyð­ar­á­standi var lýst yfir í dag.

Trump var spurður af blaða­mönnum hvort hann hefði verið próf­aður svo að hægt væri að ganga úr skugga um að hann væri ekki sýktur af veirunni. Ástæðan er sú að fjöl­miðla­full­trúi for­seta Bras­il­íu, sem var við­staddur fund hans með Trump á laug­ar­dag, hefur greinst með COVID-19. Trump svar­aði spurn­ing­unni ekki beint en sagð­ist ekki hafa sýnt nein ein­kenni.