Vil­hjálmur Birg­is­son, for­maður Verka­lýðs­fé­lags Akra­ness, segir að hann lýsi undrun sinni á orðum Drífu Snædal, for­seta Alþýðu­sam­bands Íslands (ASÍ), sem sagði í við­tali á RÚV í morgun ekki væri hægt að lækka mót­fram­lag atvinnu­rek­enda í líf­eyr­is­sjóði starfs­manna tíma­bundið vegna þess að það væri „of alvar­leg aðgerð til að hægt sé að grípa til henn­ar.“

Vil­hjálmur segir að Drífa hafi á fundi síð­ast­lið­inn föstu­dag lagt fram til­lögu um að fresta öllum launa­hækk­unum á íslenskum vinnu­mark­aði tíma­bund­ið. „Það vekur því for­undrun mína að telja það í lagi að leggja fram til­lögu um að fresta og taka allar launa­hækk­anir af launa­fólki á öllum íslenskum vinnu­mark­aði, en segja núna nokkrum dögum síðar að það sé of „al­var­lega aðgerð“ að lækka mót­fram­lag atvinnu­rek­enda tíma­bundið í líf­eyr­is­sjóð.[...]Mér finnst það þyngra en tárum taki að hafa lagt fram til­lögu um taka tíma­bundið launa­hækk­anir af launa­fólki í stað þess að fara þessa líf­eyr­is­leið sem skilar eins og áður hefur komið fram sama ávinn­ingi. En það virð­ist vera sem sumir í verka­lýðs­hreyf­ing­unni líti á líf­eyr­is­sjóð­ina sem „heilaga“ sem aldrei megi gagn­rýna né snerta.“

Þetta kemur fram í stöðu­upp­færslu Vil­hjálms á Face­book. Hann ákvað fyrr í dag að segja af sér emb­ætti vara­for­seta ASÍ til að mót­mæla ákvörðun sam­bands­ins um að hafna því að mót­fram­lag atvinnu­rek­enda í líf­eyr­is­sjóð starfs­manna þeirra yrði lækkað um 3,5 pró­sentu­stig í sex mán­uði hið minnsta. 

Hann segir að það liggi fyrir að fjöl­margir atvinnu­rek­endur hafi óskað eftir við stétt­ar­fé­lögin að við þessar for­dæma­lausu aðstæður sem uppi eru yrðu launa­hækk­unum sem koma til fram­kvæmda í dag, og samið var um í Lífs­kjara­samn­ing­un­um, frestað. „Ég hef alltaf sagt að það komi ekki til greina, enda þarf launa­fólk á þessum launa­hækk­unum á að halda. Hins vegar höfum við Ragnar Þór hjá VR viljað fara aðra leið vegna þess skelf­ingar ástands sem ríkir á vinnu­mark­aðnum vegna far­ald­urs­ins,“ skrifar Vil­hjálm­ur. 

Aðal­mark­miðið með þeirri aðgerð væri að verja störf og ef hún myndi leiða til þess að okkur tæk­ist að verja 200, 400, 500 eða jafn­vel þús­undir starfa þá væri hún skyn­sam­leg að mati Vil­hjálms. „Það er ábyrgð­ar­laust að gera ekki neitt enda er vinnu­mark­að­ur­inn að breyt­ast í blóð­ugan víg­völl og það bitnar eins og alltaf á almennu launa­fólki eins og tölur Vinnu­mála­stofn­unar stað­festa.“

Vil­hjálmur seg­ist hafa skynjað á sam­tölum sínum við stjórn­völd á und­an­förnum dögum að það væri fullur vilji þeirra til að styðja við, ef verka­lýðs­hreyf­ingin og atvinnu­rek­endur næðu sam­an, með nokkrum „að­gerðum eins og að koma hlut­deild­ar­lán­unum í gegn sem Covid mál sem og að verja heim­ilin fyrir hugs­an­legu verð­bólgu­skot­i.“