Oddný G. Harð­ar­dótt­ir, full­trúi Sam­fylk­ingar í efna­hags- og við­skipta­nefnd, leggur til að þau fyr­ir­tæki sem hafi nýtt sér skatta­skjól geti ekki fengið styrk til að greiða upp­sagn­ar­frest. Þetta kemur fram í breyt­ing­ar­til­lögu hennar við frum­varp til laga um stuðn­ing úr rík­is­sjóði vegna greiðslu hluta launa­kostn­aðar á upp­sagn­ar­fresti. Í til­kynn­ingu frá þing­flokki Sam­fylk­ing­ar­innar kemur fram að hann telji upp­sagn­ar­leið­ina svoköll­uðu geta unnið gegn launa­fólki í sumum til­fell­u­m.

Í nefnd­ar­á­liti gerir Oddný grein fyrir breyt­ing­ar­til­lög­un­um. Fyrir það fyrsta leggur hún til að fyr­ir­tæki sem nýti sér þetta úrræði end­ur­greiði styrk­inn eftir því sem afkoma og afkomu­bati leyf­ir. Þetta telur hún skapa hvata fyrir fyr­ir­tæki til að halda í ráðn­ing­ar­sam­band við launa­fólk. Breyt­ing­ar­til­lagan felur í sér að end­ur­greiðslan verði í formi tekju­skatts­auka sem nemi 10 pró­sentu­stigum til við­bótar við núver­andi tekju­skatts­pró­sentu. Tekju­skatts­auk­inn yrði fyrst lagður á 2023 og yrði að hámarki næstu 10 ár.

Önnur til­laga snýr að skatta­skjólum og þeim fyr­ir­tækjum sem nýta sér þau. Í áður­nefndu nefnd­ar­á­liti segir um breyt­ing­ar­til­lög­una: „Þar er miðað við að til þess að öðl­ast rétt á stuðn­ingi sam­kvæmt lög­unum þurfi að liggja fyrir að við­kom­andi félag hér á landi eða raun­veru­legur eig­andi þess hafi ekki átt í fjár­hags­legum sam­skiptum við aðila sem stað­settur er á lág­skatta­svæði síð­ast­liðin þrjú ár.“ ­Fyr­ir­tæki sem verða upp­vís að því að hafa gefið rangar upp­lýs­ingar yrðu krafin um end­ur­greiðslu.

Þá leggur Oddný fram þá til­lögu að sett verði skil­yrði um áætlun í lofts­lags­málum fyrir stuðn­ingi við atvinnu­rek­end­ur. Miðað er við að skil­yrðið nái til fyr­ir­tækja sem segja upp tíu starfs­mönnum eða fleiri í fullu starfi. Í skil­yrð­inu felst sú krafa að fyr­ir­tæki leggi fram áætlun um árlega minnkun á losun gróð­ur­húsa­loft­teg­unda næstu fimm árin.

Síð­asti hluti nefnd­ar­á­lits­ins snýr að launa­við­miði. Í breyt­ing­ar­til­lög­unum er sett þak á mán­að­ar­laun æðstu stjórn­enda og eig­enda. Sam­kvæmt breyt­ing­ar­til­lög­unni mega þau ekki nema hærri fjár­hæð en þremur millj­ónum króna á mán­uði.