Fjórir til við­bótar greindust með COVID-19 hér á landi í gær og er fjöldi virkra smita því orð­inn 28. Allt er fólkið í ein­angr­un. 187 eru komnir í sótt­kví. Ekki hafa verið fleiri virk smit á land­inu frá því í byrjun maí. 

Þessir fjórir ein­stak­lingar sem greindust í gær smit­uð­ust allir hér inn­an­lands og eru því inn­an­lands­smitin orðin 18.

Í gær voru stað­fest smit 24 og af þeim höfðu fjórt­án ein­stak­lingar smit­ast hér á landi. Kári Stef­áns­son, for­stjóri Íslenskrar erfða­grein­ing­ar, sagði við RÚV í gær að hann væri ugg­andi út af stöð­unni og ótt­að­ist að veiran væri aftur að kom­ast á flug. Benti hann á að þrír af þeim ­sem væru með COVID-19 væru sýktir af veiru af sama stofni en virt­ust ekki tengj­ast. Því væri mögu­legt að smit í sam­fé­lag­inu væri útbreidd­ara en menn héldu.

Íslensk erfða­grein­ing hefur aftur tekið að sér það hlut­verk að skima fyrir veirunni í sam­fé­lag­inu. Þá hefur hún einnig það verk­efni að rað­greina veiruna í þeim sýnum sem hún finnst til að kom­ast að upp­runa þeirra.

Í gær voru 173 í sótt­kví. Í dag er fjöld­inn orð­inn 187.

Alma Möller land­læknir sagði í gær að hinir sýktu sýndu ekki al­var­leg ein­kenni en Kári benti á að í ein­hverjum til­fellum hafi þeir reyn­st ­með mikið magn af veirunni í lík­am­anum og því verið mjög smit­andi.

Í gær voru tekin 118 sýni á sýkla- og veiru­fræði­deild Land­spít­al­ans. Frá því fyrsta smitið greind­ist hér á landi 28. febr­úar hefur 1.861 greinst með COVID-19 hér á landi.

Í dag kemur í ljós, eftir fund heil­brigð­is­ráð­herra með land­lækni og full­trúum almanna­varna og sótt­varna­lækn­is, hvort að við­bún­að­ar­stig verði aftur hækkað á neyð­ar­stig og hvort gripið verði aftur til hertra aðgerða.