Icelandair Group er búið að und­ir­ritað samn­inga við alla kröfu­hafa sína og er auk þess búið að ná end­an­legu sam­komu­lagi við banda­ríska flug­véla­fram­leið­and­ann Boeing vegna kyrr­setn­ingar MAX flug­véla. Þetta kemur fram í til­kynn­ingu til Kaup­hallar Íslands sem send var út í kvöld. 

Félagið til­kynnti fyrir nokkru að búið væri að semja við flesta kröfu­hafa og að þeir sem væru eftir myndu klár­ast í síð­ustu viku. Nú liggur fyrir að því mark­miði er náð, en það var for­senda þess að Icelandair gæti ráð­ist í hluta­fjár­út­boð síðar í þessum mán­uði.

Í til­kynn­ing­unni segir að efn­is­at­riði sam­komu­lags­ins við Boeing sé trún­að­ar­mál en það feli í meg­in­dráttum í sér að félagið fellur frá kaupum á fjórum vélum og áætlun um afhend­ingu sex MAX véla sem eru útistand­andi hefur verið breytt. „Gert er ráð fyrir að þær verði nú afhentar á tíma­bil­inu frá öðrum árs­fjórð­ungi 2021 fram til fyrsta árs­fjórð­ungs 2022. Þá felur sam­komu­lagið í sér frek­ari bætur fyrir stóran hluta þess tjóns sem félagið hefur orðið fyrir vegna kyrr­setn­ingar MAX vél­anna og verða þær greiddar út að mestu fyrir lok ann­ars árs­fjórð­ungs 2021. Sam­komu­lagið styrkir lausa­fjár­stöðu Icelandair Group og stuðlar að auknum sveigj­an­leika þegar kemur að skipu­lagi flota­mála á næstu árum.“

Til við­bótar við sam­komu­lagið við Boeing hefur félagið náð sam­komu­lagi við kröfu­hafa um skil­mála­breyt­ing­ar. Samn­ingar við kröfu­hafa taka mið af því að laga afborg­anir að væntu sjóð­streymi frá rekstri. Þeir eru háðir því að félagið nái mark­miðum sínum um öflun nýs hluta­fjár og geri samn­ing um lána­línu með rík­is­á­byrgð, sem unnið er að slíkum samn­ingi með aðkomu rík­is­bank­anna Íslands­banka og Lands­bank­ans. 

Í til­kynn­ing­unni segir að við­ræður við stjórn­völd um útfærslu lána­lín­unnar séu langt komn­ar. Félagið gerir ráð fyrir að birta fjár­festa­kynn­ingu með ítar­legum upp­lýs­ingum fyrir fjár­festa og þátt­tak­endur í fyr­ir­hug­uðu hluta­fjár­út­boði og tíma­línu á næstu dög­um.