Björn Leví Gunnarsson, þingmaður Pírata, hefur lagt fram breytingartillögu við fjárlagafrumvarp næsta árs sem felur í sér að lífeyrir almannatrygginga og atvinnuleysisbætur hækki í samræmi við hækkanir á lífskjarasamningi. Samkvæmt því sem fram kemur í tillögunni, og byggt er á áætlun miðað við fyrirliggjandi gögn, myndu greiðslur vegna öryrkjalífeyris og atvinnuleysisbóta aukast um 10,5 milljarða króna samtals á næsta ári verði tillagan samþykkt.
Þorri þeirrar upphæðar myndi fara í greiðslu hærri atvinnuleysisbóta, eða 8,7 milljarðar króna. Heildarkostnaður ríkissjóðs vegna þeirra yrði þá 71 milljarður króna á næsta ári. Lífeyrisgreiðslur úr almannatryggingakerfinu myndu aukast um 1,8 milljarða króna og verða 81,3 milljarðar króna.
„Sístækkandi hópur öryrkja býr við sárafátækt“
Samkvæmt útreikningum Öryrkjabandalags Íslands mun sú hækkun skila því að framfærsluviðmið almannatrygginga verði 265.044 krónur fyrir skatt, sem, að teknu tilliti til þeirra skattkerfisbreytinga sem koma til framkvæmda um áramótin. Það muni skila rétt tæpum 233 þúsund krónum í vasa þeirra sem lifa af örorkulífeyri.
Aðalfundur Öryrkjabandalagsins samþykkti á mánudag ályktun þar sem sagði að í þrjú ár hefði ríkisstjórn Katrínar Jakobsdóttur, Bjarna Benediktssonar og Sigurðar Inga Jóhannssonar ákveðið að auka fátækt fatlaðs og langveiks fólks í stað þess að bæta kjör þeirra. „Sístækkandi hópur öryrkja býr við sárafátækt. Það veldur aðalfundi Öryrkjabandalags Íslands miklum vonbrigðum að um áramótin 2020-2021 verði munurinn á örorkulífeyri og lágmarkslaunum orðinn kr. 86.000.“
Í ályktuninni sagði að frá árinu 2007 hefði bil á milli örorkulífeyris og lágmarkslauna stöðugt breikkað. „Í valdatíð núverandi ríkisstjórnar hefur ekkert verið gert til að bregðast við þessari kjaragliðnun, heldur þvert á móti hefur bilið breikkað enn meira, þrátt fyrir að ríkisstjórnin segist vinna í anda heimsmarkmiða Sameinuðu þjóðanna, hvar efst á blaði er að útrýma fátækt. Nú þegar Bjarni hefur lagt fram sitt síðasta fjárlagafrumvarp á kjörtímabilinu er enga breytingu að sjá.“
Aðalfundurinn krafðist því þess að „ríkisstjórnin endurskoði afstöðu sína gagnvart lífskjörum fatlaðs og langveiks fólks og bæti kjör okkar án tafar. Skömm ríkisstjórnarinnar er að halda okkur í fátækt og skýla sér á bakvið COVID og slæmt efnahagsástand."
