„Getur verið að Brynjar eigi í erf­ið­leikum með að skilja tölur og marg­feldi þeirra?“ spyr Ragnar Freyr Ingv­ars­son, umsjón­ar­læknir COVID-­göngu­deildar Land­spít­al­ans. „Ef gefið verður frjálst munu fórn­ar­lömb far­ald­urs í mik­illi upp­sveiflu marg­fald­ast.“

Til­efni skrifa Ragn­ars Freys er við­tal sem birt er á mbl.is við Brynjar Níels­son, þing­mann Sjálf­stæð­is­flokks­ins. Þar segir Brynjar rík­is­stjórn­ina hljóta að velta því upp á hverjum degi hvort ástæða sé til þess að fara rólegar í sak­irnar í sótt­varna­að­gerðum sem hafi lam­andi áhrif á allt sam­fé­lag­ið. Sam­fé­lags­legi skað­inn sem þær valdi kunni að vera meiri en aug­ljós heilsu­fars­legur skaði af völdum far­sótt­ar­inn­ar. „Fer allt á hlið­ina jafn­vel þó að við lokum ekki öllu?“ spyr Brynj­ar. „Er þessi veira svo skæð að við getum rétt­lætt þetta bara með því að ein­hver geti dáið?“

Ragnar Freyr bendir á í færslu sem hann skrifar á Face­book í kvöld að í fyrstu bylgju far­ald­urs­ins hafi um 3.600 ein­stak­lingar smit­ast af veirunni hér á landi. Hann segir í sam­tali við Kjarn­ann að það sé sú tala sem mótefna­mæl­ingar sem gerðar hafa verið bendi til.  Í þeirri bylgju lögð­ust 115 inn á sjúkra­hús, 26 á gjör­gæslu og 10 lét­ust.

„Og það var á meðan allt sam­fé­lagið lagð­ist heils­hugar á eitt, breytti hegðun sinni, til að takast á við þessa gríð­ar­stóru áskor­un,“ rifjar Ragnar upp. „Við þær aðstæður upp­skárum við þó þennan fórn­ar­kostn­að. Ef tíu sinnum fleiri myndu veikj­ast myndum við að minnsta kosti upp­skera rúm­lega 1150 inn­lagn­ir, 260 á gjör­gæslu og 100 myndu deyja.“

Og þó væru þá ennþá tæp­lega 90% Íslend­inga næmir fyrir veirunn­i.  „Fyrir hverja 1000 smit­aða fáum við um 32 inn­lagn­ir, 2,6 á gjör­gæslu og 1 deyr. Að minnsta kost­i.“

Þórólfur Guðna­son sótt­varna­læknir var spurður út í hjarð­ó­næmi á upp­lýs­inga­fund­inum í dag. Hver hans skoðun væri á því núna eftir alla þá þekk­ingu og reynslu sem væri nú til stað­ar. Þórólfur benti á að ekk­ert land væri nálægt því að ná hjarð­ó­næmi. Sví­þjóð væri enn langt frá því þó að leiðin væri oft kennd við það land. Þar hefðu um 10 pró­sent íbúa þeirra svæða sem verst hefðu orðið úti í far­aldr­inum sýkst en til að ná hjarð­ó­næmi þarf um 60-70 pró­sent af sam­fé­lagi að smit­ast. Ef veirunni væri leyft að ganga um sam­fé­lagið óáreitt þá myndi það hafa hræði­legar afleið­ingar og heil­brigð­is­kerfið verða yfir­keyrt, sagði sótt­varna­lækn­ir.

Í þess­ari bylgju far­ald­urs­ins hafa um 1.000 smit­ast hér á landi, 24 eru á sjúkra­húsi, þrír á gjör­gæslu. Ragnar Freyr segir að sem betur fer hafi eng­inn dáið. „En þetta eru ekki bara ein­hverjir ein­hverj­ir. Þetta eru afar okkar og ömm­ur, pabbar og mömm­ur. Vin­ir, vanda­menn og ást­vin­ir!

Þetta gæti meira segja verið Brynjar sjálf­ur.“