Öryrkjabandalag Íslands (ÖBÍ) segir að eftir lestur minnisblaðs Bjarna Benediktssonar fjármála- og efnahagsráðherra standi eftir sú „tilfinning að tilgangur minnisblaðsins sé fyrst og fremst til að ýja að því að það séu öryrkjarnir sem frekastir eru á fleti“. Þetta kemur fram í tilkynningu frá ÖBÍ.
Kjarninn greindi frá því í dag að fjármála- og efnahagsráðherra hefði lagt fram minnisblað á ríkisstjórnarfundi í gær um framlög til almannatrygginga. Samkvæmt því minnisblaði rennur sífellt aukinn hluti verðmætasköpunar hagkerfisins til tilfærslukerfa og fjárframlaga ríkissjóðs. Sérstaklega var fjallað um framlög til almannatrygginga, að frátöldum atvinnuleysisbótum, og sagt að þau hefðu nær tvöfaldast frá árinu 2013 miðað við verðlag hvers árs.
Í stöðuuppfærslu sem Bjarni birti á Facebook í dag sagði hann það vera mikið áhyggjuefni að frá árinu 2013 hefði þeim sem eru á örorkubótum eða endurhæfingarlífeyri fjölgað um 4.300 manns.
Segja framsetninguna villandi
Samkvæmt ÖBÍ er framsetningin sem ráðherra velur villandi. „Og gleymum ekki kosningaloforðinu sem ráðherra gaf eldri borgurum fyrir nokkrum árum stærsti hluti aukningar útgjalda til almannatrygginga farið í að efna það. Öryrkjar hafa ekki fengið neitt.
Fjármálaráðherra vill líka sýna fram á hve gríðarleg fjölgun örorkulífeyrisþega hefur orðið og birtir máli sínu til stuðnings línurit.
Þar má sjá hlutfall örorkulífeyrisþega, örorkustyrkþega og endurhæfingalífeyrisþega sem hlutfall af fólki á vinnufærum aldri. Einhverra hluta vegna tekur ráðherra þó sérstaklega út úr jöfnunni innflytjendur, eða erlent vinnuafl, eins og þessi hópur skipti engu máli í verðmætasköpun landsins,“ segir í tilkynningunni.
Óskiljanlegt að taka út þennan hóp
Þá kemur fram hjá ÖBÍ að það að taka þennan hóp út sé „eiginlega óskiljanlegt“. Innflutt vinnuafl sé hluti af öllum öðrum þjóðhagsstærðum, skattgreiðslum og landframleiðslu.
„Ráðherra er einnig ofarlega í huga fjölgun öryrkja á tímabilinu sem hann velur sér. 4.300 einstaklingar, eða jafn margir og búi í Vestmannaeyjum. Setjum þessa tölu í samhengi. Á sama tíma hefur íbúum landsins fjölgað um 45.250. Það er aðeins rúmlega íbúatala Kópavogs og Seltjarnarness.
Hvað skyldi 4.300 manns vera hátt hlutfall af þessari fjölgun? Jú 9,5 prósent, en tafla ráðherra sýnir einmitt að fjöldi öryrkja sem hlutfall af mannfjölda er 9,2 prósent og hefur verið undanfarin ár. Munurinn 0,3 prósentustig, en hér höfum við í huga dugnað starfsmanna TR árið 2016 er þeir unnu niður uppsafnaðar umsóknir. Það skiptir nefnilega máli hvernig hlutirnir eru bornir fram.
Enda ef skoðað er hlutfallið, sem ráðherra vill meina að sé að ríða ríkissjóði að fullu, með öllum sem leggja til landsframleiðslunnar, sést að það breytist nær ekkert. Í raun hefur hlutfall örorkulífeyrisþega af fólki á vinnualdri, lækkað eða staðið í stað undanfarin ár. Það er nú öll hörmungin,“ segir í tilkynningunni.
