Stefán Ólafsson lætur af störfum hjá HÍ, hættir við framboð og fer í fullt starf hjá Eflingu

Prófessor í félagsfræði, sem hefur verið fastráðinn við Háskóla Íslands frá áriu 1970, hefur ákveðið að ráða sig í fullt starf hjá Eflingu. Hann er hættur við að sækjast eftir sæti á lista Samfylkingarinnar fyrir næstu kosningar.

Þórður Snær Júlíusson 22. desember 2020

Stefán Ólafsson, prófessor í félagsfræði, hefur ákveðið að láta af störfum hjá Háskóla Íslands eftir 40 ára starf innan skólans.

Hann greinir frá ákvörðuninni í stöðuuppfærslu á Facebook og segir þar að honum hafi verið boðið fullt starf hjá Eflingu-stéttarfélagi sem hann hafi ákveðið að þiggja. „Ég hef verið í hálfu starfi þar sem sérfræðingur síðan 2018 og líkað afar vel að vinna með hinni nýju öflugu forystu sem þar ryður nýjar brautir inn í framtíðina.“

Stefán var ráðinn í hálft starf hjá Eflingu í júní 2018 en það starf fól í sér umsjón með rannsóknar-og greiningarvinnu auk þess sem hann hefur verið Sólveigu Önnu Jónsdóttur, formanni Eflingar, og stjórn félagsins til ráðgjafar um stefnumótun í kjaramálum og á tengdum sviðum.

Stefán tók síðar sæti í stjórn Gildis lífeyrissjóðs, þriðja stærsta lífeyrissjóðs landsins, fyrir hönd Eflingar. Hann er nú stjórnarformaður Gildis.

Stefán lauk doktorsprófi í félagsfræði árið 1982 frá Oxford-háskóla í Englandi og hefur verið fastráðinn við Háskóla Íslands síðan 1970. Af ritum hans má nefna bækurnar Hagvöxtur og hugarfar frá 1996 og Íslenska leiðin frá 1999 en nýjasta rit hans, samið með Arnaldi Sölva Kristjánssyni, er Ójöfnuður á Íslandi sem kom út árið 2018.

Hann skrifar reglulega greinar sem birtast á Kjarnanum. Sú síðasta, sem birtist 12. desember, bar fyrirsögnina „Neyðaraðstoð til þeirra best settu!“ Þar spurði Stefán hvers vega verið væri að lækka skatta á vel stætt efnafólk sem hefur aukið eignir sínar stórlega á síðustu árum.

Stefán var einnig á meðal þeirra 49 einstaklinga sem gáfu kost á sér á lista Samfylkingarinnar í Reykjavík fyrir næstu þingkosningar, sem fram fara að óbreyttu í september á næsta ári. Stefán segir í samtali við Kjarnann að hann hafi dregið það framboð til baka í kjölfar þess að hafa ráðið sig í fullt starf hjá Eflingu.

Við þurfum á þínu framlagi að halda

Þú getur tekið beinan þátt í að halda úti öflugum fjölmiðli.

Við sem vinnum á ritstjórn Kjarnans viljum hvetja þig til að vera með okkur í liði og leggja okkar góða fjölmiðli til mánaðarlegt framlag svo við getum haldið áfram að vinna fyrir lesendur, fyrir fólkið í landinu.

Kjarninn varð níu ára í sumar. Þegar hann hóf að taka við frjálsum framlögum þá varð slagorðið „Frjáls fjölmiðill fyrir andvirði kaffibolla“ til og lesendur voru hvattir til að leggja fram í það minnsta upphæð eins kaffibolla á mánuði.

Mikið vatn hefur runnið til sjávar á þeim níu árum sem Kjarninn hefur lifað. Í huga okkar á Kjarnanum hefur þörfin fyrir fjölmiðla sem veita raunverulegt aðhald og taka hlutverk sitt alvarlega aukist til muna.

Við trúum því að Kjarninn skipti máli fyrir samfélagið.

Við trúum því að sjálfstæð og vönduð blaðamennska skipti máli.

Ef þú trúir því sama þá endilega hugsaðu hvort Kjarninn er ekki allavega nokkurra kaffibolla virði á mánuði.

Vertu með okkur í liði. Þitt framlag skiptir máli.

Ritstjórn Kjarnans: Sunna Ósk Logadóttir, Þórður Snær Júlíusson, Erla María Markúsdóttir, Arnar Þór Ingólfsson, Eyrún Magnúsdóttir og Grétar Þór Sigurðsson.

Já takk, ég vil styrkja Kjarnann!

Orðafjöldi: 375 Færslan var síðast uppfærð: 22. desember 2020, kl. 18:16
Færslan birtist fyrst: 22. desember 2020, kl. 11:25

Fréttin var uppfærð klukkan 15:59 með þeim upplýsingum að Stefán Ólafsson hafi dregið sig út úr því að sækjast eftir sæti á lista Samfylkingarinnar í Reykjavík fyrir næstu kosningar. Það gerði hann í kjölfar þess að vera ráðinn í fullt starf hjá Eflingu.