Jeff Bezos stofn­andi og for­stjóri banda­ríska stór­fyr­ir­tæk­is­ins Amazon ætlar að skipta um hlut­verk í sumar og færa sig yfir í hlut­verk stjórn­ar­for­manns hjá fyr­ir­tæk­inu. Þetta kemur fram í til­kynn­ingu frá Amazon.

Þar segir að Andy Jessy, sem í dag er æðsti yfir­maður skýja­vinnslu­deildar fyr­ir­tæk­is­ins, verði næsti for­stjóri. Hann mun taka við kefl­inu af Bezos í upp­hafi þriðja árs­fjórð­ungs.

Jessy hefur starfað hjá Amazon allt frá árinu 1997 og hefur löngum verið tal­inn lík­leg­astur til þess að verða næsti for­stjóri, þegar Bezos myndi stíga frá dag­legum rekstri Amazon-veld­is­ins fyrir fullt og allt. Nú er ljóst hvenær það verð­ur.

Geispið besta hrósið

Í til­kynn­ing­unni frá Amazon er haft eftir Bezos að Amazon sé það sem það sé í dag vegna nýj­ung­anna sem það hafi komið með fram á sjón­ar­svið­ið.

„Ef þú fram­kvæmir hlut­ina rétt þá verður óvænt nýsköpun orðin venju­leg innan fárra ára. Fólk geispar. Þetta geisp er besta hrós sem upp­finn­inga­maður getur feng­ið,“ er haft eftir Bezos, í til­kynn­ing­unni frá Amazon.

Þar segir hann einnig að hann telji Amazon aldrei hafa verið jafn skap­andi og því sé þessi tíma­punktur kjör­inn til að hann sjálfur taki að sér nýtt hlut­verk.

Bezos stofn­aði Amazon árið 1994, í upp­hafi ein­fald­lega sem raf­ræna bóka­búð. Síðan þá hefur fyr­ir­tækið heldur betur vaxið og er í dag orðið stærsta net­versl­un­ar­fyr­ir­tæki í heimi, auk þess sem fyr­ir­tækið hannar og fram­leiðir margs­konar vörur undir eigin vöru­merki.