Arion banki hefur ákveðið að tryggja starfs­fólki sínu 80 pró­sent launa í fæð­ing­ar­or­lofi í sex mán­uði. Það þýðir að bank­inn skuld­bindur sig til að greiða starfs­fólki sínu sem er með hærri laun en 600 þús­und krónur á mán­uði (há­marks­greiðsla á mán­uði úr fæð­ing­ar­or­lofs­sjóði) sér­stakan við­bót­ar­styrk svo það haldi 80 pró­sent af kjörum sín­um. 

Í til­kynn­ingu frá bank­anum segir að styrk­ur­inn komi til við­bótar greiðslum úr Fæð­ing­ar­or­lofs­sjóði og kjara­samn­ings­bundnum styrkjum svo að laun í fæð­ing­ar­or­lofi kom­ist sem næst 80% launa. Jafn­framt hvetur bank­inn starfs­fólk til að nýta fæð­ing­ar­or­lofs­rétt sinn að fullu.

Laun starfs­manna í bönkum eru mis­mun­andi eftir því hvaða verk­efnum þau sinna. Mán­að­­ar­­laun starfs­­fólks í ráð­­gjöf og sölu verð­bréfa, meðal ann­ars þeirra sem starfa við slíkt hjá Arion banka, voru til að mynda yfir 1,7 millj­­ónir króna á mán­uði í fyrra. Með­al­verð­bréfa­sali sem starfar hjá Arion banka myndi sam­kvæmt þessu fá 1.360 þús­und krónur á mán­uði í laun í fæð­ing­ar­or­lofi eða 760 þús­und krónum meira en hann fengi ef við­kom­andi fengi ein­ungis greiðslur úr fæð­inga­or­lofs­sjóði.

Fyrir starfs­mann sem er með eina milljón króna á mán­uði í laun mun þetta þýða við­bót­ar­styrk upp á 200 þús­und krónur á mán­uði og fyrir þann sem er með 800 þús­und krónur á mán­uði um 40 þús­und krón­ur. Ef Bene­dikt Gísla­son, banka­stjóri Arion banka, færi í fæð­ing­ar­or­lof myndi hann fá rúm­lega 3,2 millj­ónir króna í við­bót­ar­styrk á mán­uði frá bank­anum ofan á fæð­ing­ar­or­lofs­greiðsl­urnar úr opin­bera sjóðn­um, en hann var með 4,8 millj­ónir króna á mán­uði að jafn­aði í laun í fyrra. 

Vilja auð­velda starfs­fólki að taka orlof

Aðgerðin er hluti af áætlun Arion banka við að jafna hlut kynj­anna innan bank­ans. Í til­kynn­ingu bank­ans segir að með­al­laun karla, bæði í Arion banka og sam­fé­lag­inu öllu, séu hærri en með­al­laun kvenna og feður nýti að jafn­aði síður fæð­ing­ar­or­lofs­rétt sinn en mæð­ur. „Með því að tryggja starfs­fólki 80 pró­sent launa í fæð­ing­ar­or­lofi er for­eldrum, óháð kyni eða annarri stöðu, auð­veldað að nýta fæð­ing­ar­or­lofs­rétt sinn. Þannig miðar aðgerðin m.a. að því að fjölga þeim feðrum sem nýta fæð­ing­ar­or­lofs­rétt sinn og til lengri tíma litið getur hún verið liður í að jafna ann­ars vegar með­al­laun kynj­anna og hins vegar hlut kynj­anna í hópi stjórn­enda og í ólíkum starfa­flokk­um, en konur eru í dag 44 pró­sent stjórn­enda bank­ans.“

Bene­dikt hvetur starfs­fólk sitt í sömu til­kynn­ingu að nýta fæð­ing­ar­or­lofs­rétt sinn, óháð kyni eða annarri stöðu. „Við viljum auð­velda starfs­fólki okkar að taka fæð­ing­ar­or­lof með því að tryggja öllum nýbök­uðum for­eldrum 80 pró­sent af launum sínum á þessum dýr­mæta og mik­il­væga tíma í lífi þeirra og barna þeirra. Jafn­framt viljum við með þessu gera Arion banka að enn eft­ir­sókn­ar­verð­ari vinnu­stað fyrir ungt og hæfi­leik­a­ríkt fólk.“