„Fyrsta mars á næsta ári eru 12 ár liðin síðan ég tók við starfi for­stjóra Orku­veitu Reykja­vík­ur. Það er vilji minn að láta af starfi for­stjóra á þeim tíma­mót­um. Með því að boða starfs­lok mín með góðum fyr­ir­vara vil ég gefa stjórn OR tæki­færi til að hefja leit að eft­ir­manni, konu eða karli,“ segir í bókun for­stjóra Orku­veitu Reykja­víkur sem hann lagði fram á fundi stjórnar í dag mánu­dag.

Bjarni segir í bók­un­inni að nýtt kjör­tíma­bil sé hafið og ný stjórn taki senn við taumunum í Orku­veitu Reykja­vík­ur.

„Ný stjórn mun vænt­an­lega hefja veg­ferð­ina með stefnu­mótun fyri Orku­veitu­sam­stæð­una til næstu ára. Ég tel mik­il­vægt að hún fái tæki­færi til að vinna það verk með eft­ir­manni mín­um. Ég tel því að þetta sé rétti tím­inn fyrir mig og fyrir Orku­veitu Reykja­víkur að ég stígi til hlið­ar. Ég óska því eftir sam­þykki stjórnar OR fyrir því ferli sem ég hef lýst hér að fram­an.“

Stjórn OR féllst á erindi Bjarna og þakk­aði góðan fyr­ir­vara til að finna fyr­ir­tæk­inu nýjan for­stjóra, að því er segir í til­kynn­ingu frá OR.