Þau tólf blöð sem útgáfu­fé­lagið Fót­spor ehf. gaf áður út, og Vef­pressan keypti í sum­ar, munu halda áfram að koma út og fleiri blöð munu bæt­ast við. Þetta segir Björn Ingi Hrafns­son, útgef­andi og stjórn­ar­for­maður Vef­pressunn­ar, við mbl.­is. Á meðal þeirra blaða sem Fót­spor hefur haldið úti eru Reykja­vík Viku­blað og Akur­eyri Viku­blað.

Hann segir ástæðu þess að útgáfan hafi ekki haf­ist á ný eftir kaup Vef­pressunnar á blöð­unum sé sú að beðið sé sam­þykki Sam­keppn­is­eft­ir­lits­ins fyrir kaup­un­um. Þegar það liggi fyrir verði aftur hafin útgáfa á blöð­unum og að "ný blöð munu líta dags­ins ljós".

Björn Ingi Hrafns­son, aðal­eig­andi og útgef­andi Vef­press­un­ar, sem á meðal ann­ars DV.

Vef­pressan, fyr­ir­tæki Björns Inga, keypti  Fótspor, í lok júlí. Hún á einnig vef­ina Eyj­una, Bleikt, Press­una, DV.is og dag­blaðið DV. Ámundi Ámunda­son var ábyrgð­ar­maður blaða og aug­lýs­inga­stjórn Fótspors, en hann sagði við það tæki­færi við Vísi að Vef­pressan hefði keypt útgáfu­rétt­inn að blöð­un­um. Rekstri Fótspors yrði hætt en Ámundi myndi starfa hjá Vef­press­unni.  Hann sagði Björn Inga hafa haft sam­band við sig að fyrra bragði.

Allir rit­stjórar blað­anna sem Fót­spor gaf út voru verk­tak­ar. Því var hægt að segja upp verk­samn­ingum þeirra með viku upp­sagn­ar­frest­i. ­Björn Þor­láks­son, sem var rit­stjóri Akur­eyri viku­blaðs, gaf það út skömmu eftir að gengið hafði verið frá kaup­un­um að hann myndi ekki starfa áfram undir stjórn nýrra eig­enda. „Ekki séns í hel­víti, Björn Ingi Hrafns­son,“ sagði hann um það eftir að hafa hugsað málið í tvær nætur að eigin sögn. Hann sagði á Face­book-­síðu sinni að hann gæti aldrei átt trúnað við Björn Inga, „því ég trúi ekki að þú hafir trúnað við almanna­hags­muni að leið­ar­ljósi með þinni útgáfu­starf­semi. Held að þín áhersla sé á hreina sér­hags­mun­i.“