Í nýlegri leigumarkaðskönnun Húsnæðis- og mannvirkjastofnunar (HMS) kom fram að meðalfermetraverð leiguíbúða á stúdentagörðum væri hærra en á nokkrum öðrum leigumarkaði hérlendis. Meðalfermetraverð þeirra var 2.545 krónur í september.
Þrátt fyrir hátt fermetraverð greiða leigjendur á stúdentagörðum lægstu upphæðina í leigu, sökum þess hversu litlar íbúðir þeirra eru. Meðalstærð íbúða á stúdentagörðunum er 48 fermetrar, á meðan stærð íbúða á öðrum leigumörkuðum er vanalega í kringum 80 fermetra.
Í kjölfar þess að niðurstöður könnunarinnar voru birtar kallaði Félagsstofnun stúdenta, sem rekur stúdentagarðanna, eftir upplýsingum frá HMS um meðalleiguverð á íbúðum í sambærilegri stærð og þær sem í boði eru á stúdentagörðum.
Því er meðalfermetraverð leiguíbúða á stúdentagörðum rúmlega fjórðungi lægra en það er á almenna markaðnum í þeim póstnúmerum sem stúdentagarða er að finna.
Leigan lægst á stúdentagörðunum
Í könnun HMS, sem birt var í lok síðustu viku, kom fram að leigjendur sem eru búsettir í stúdentagörðum greiði 17 prósent hærri leigu fyrir hvern fermetra heldur en þeir sem leigja af einstaklingi á almennum leigumarkaði. Verðmunurinn er 18 prósent ef leigt er af einkareknu leigufélagi, en 37 prósent ef leigt er af óhagnaðardrifnu leigufélagi.
Þeir sem leigja af ættingjum og vinum greiða svo 38 prósent minna fyrir fermetrann heldur en leigjendur á stúdentagörðum, á meðan þeir sem leigja af sveitarfélagi greiða rúmlega helmingi minna.
líkt og kemur fram að ofan er þó mikill munur á stærðum þeirra íbúða sem verið er að bera saman. Meðalstærðin á stúdentagörðum er 48 fermetrar á meðan að stærð íbúða á öðrum leigumörkuðum er almennt í kringum 80 fermetra.
Heildarupphæðin sem greidd er í leigu er mest hjá þeim sem leigja hjá einkareknu leigufélagi, en þeir greiddu að meðaltali tæpar 200 þúsund krónur í leigu í september. Leigjendur á almennum leigumarkaði greiddu aftur á móti að meðaltali 178 þúsund krónur í leigu og þeir sem leigðu hjá óhagnaðardrifnum leigufélögum eða hjá ættingjum og vinum gátu vænst þess að greiða um 140 þúsund krónur í leigu. Leigjendur á stúdentagörðunum greiddu hins vegar að meðaltali 122 þúsund krónur í leigu í september.
