Guð­mundur Árni Stef­áns­son, odd­viti Sam­fylk­ing­ar­innar í Hafn­ar­firði, hefur haft sam­band við Valdi­mar Víð­is­son, odd­vita Fram­sókn­ar­flokks­ins í sveit­ar­fé­lag­inu, og óskað eftir við­ræðum um myndun nýs meiri­hluta flokk­anna tveggja þar.

Frá þessu greinir Guð­mundur Árni í stöðu­upp­færslu sem hann setti á Face­book í gær, en Sam­fylk­ingin jók fylgi sitt í Hafn­ar­firði veru­lega í kosn­ing­unum á laug­ar­dag, fékk 29 pró­sent atkvæða í stað 20,1 pró­sent árið 2018 og fjóra bæj­ar­full­trúa í stað þeirra tveggja sem flokk­ur­inn hafði áður. Fram­sókn bætti líka við sig fylgi og manni, fékk 13,7 pró­sent atkvæða í stað átta pró­senta árið 2018 og tvo menn í ell­efu manna bæj­ar­stjórn. Sjálf­stæð­is­flokk­ur­inn, sem myndar núver­andi meiri­hluta með Fram­sókn, tap­aði hins vegar þremur pró­sentu­stigum af fylgi og fékk 30,7 pró­sent atkvæða. Hann er enn stærsti flokk­ur­inn í Hafn­ar­firði en nú með jafn­marga full­trúa og Sam­fylk­ingin í stað þeirra fimm sem hann hafði áður. Rósa Guð­bjarts­dótt­ir, odd­viti Sjálf­stæð­is­flokks­ins, er núver­andi bæj­ar­stjóri í Hafn­ar­firð­i. 

Fyrir liggur að Fram­sókn er í lyk­il­stöðu Í Hafn­ar­firði eins og víða ann­ars­stað­ar. Flokk­ur­inn er í þeirri gam­al­kunnu stöðu að geta valið að vinna til hægri með Sjálf­stæð­is­flokki eða á miðju eða til vinstri með öðr­um. Í flestum til­vikum er hrein­lega ekki mögu­leiki á stjórn­ar­mynstrum nema með aðkomu Fram­sókn­ar. Þannig er málum háttað í Hafn­ar­firði. Odd­viti Fram­sóknar sagði á kosn­inga­nótt of snemmt að segja til um það hvort núver­andi meiri­hluti flokks­ins með Sjálf­stæð­is­flokki myndi halda áfram.

Í stöðu­upp­færslu sinni í gær­kvöldi segir Guð­mundur Árni að fólkið hafi talað í kosn­ing­un­um. „Í Hafn­ar­firði stimpl­uðum við jafn­að­ar­menn okkur ræki­lega inn og fengum fjóra bæj­ar­full­trúa kjörna - tvö­föld­uðum tölu þeirra eins og mark­miðið var. [...] Ég hef haft sam­band við odd­vita Fram­sókn­ar­flokks­ins og óskað eftir við­ræðum um myndun nýs meiri­hluta XS og XB í Hafn­ar­firði. En það eru flokk­arnir sem sigr­uðu og voru kall­aðir til verka, á meðan Sjálf­stæð­is­flokk­ur­inn tap­aði umtals­verðu fylgi. Við sjáum hvað set­ur. Það væri gott fyrir Hafn­firð­inga að fá félags­hyggju­meiri­hluta í Fjörð­inn. Við jafn­að­ar­menn erum nú sem fyrr til­búnir í verk­in.“