„Það setur að mér ugg og ég er farin að hafa áhyggjur af því að áætlun um nýt­ingu og vernd nátt­úru­svæða, svokölluð ramma­á­ætl­un, verði ekki afgreidd úr umhverf­is- og sam­göngu­nefnd á þessu þingi. Það er full ástæða til að hafa áhyggjur af því.“

Þetta kom fram í máli Þór­unnar Svein­bjarn­ar­dóttur þing­manns Sam­fylk­ing­ar­innar á Alþingi í dag.

Hún benti á að ramma­á­ætlun hafi ekki verið á dag­skrá umhverf­is- og sam­göngu­nefndar í morg­un. Sam­kvæmt starfs­á­ætlun séu sex þingdagar virkir eftir þangað til þingið fer í sum­ar­frí.

Hvað veld­ur?

Núgild­andi ramma­á­ætl­­un, þar sem virkj­ana­hug­­myndir eru flokk­aðar í nýt­ing­­ar-, bið- og vernd­­ar­­flokk, er frá árinu 2013 og er því orðin níu ára göm­ul.

Þór­unn rifj­aði það upp að mælt hefði verið fyrir áætl­un­inni í fjórða sinn frá því að hún leit dags­ins ljós fyrir tæpum sex árum á þing­inu en fimm sinnum hefði þessi sama áætl­un, 3. áfangi ramma­á­ætl­un­ar, verið á mála­skrá þeirrar rík­is­stjórnar sem hér hefur verið við völd.

„Sömu flokkar sem seint og snemma þreyt­ast ekki á því að ræða um mik­il­vægi end­ur­nýj­an­legrar raf­orku eða raf­orku­fram­leiðslu og nauð­syn orku­skipta virð­ast núna sitja á höndum sér þegar kemur að afgreiðslu þessa mik­il­væga áfanga í ramma­á­ætlun og ákvörð­unar um nýt­ingu og vernd nátt­úru­svæða hér á landi.

Á sama tíma og 4. áfang­inn er um það bil að verða til­bú­inn og hafin er vinnsla við 5. áfang­ann situr 3. áfangi ramma­á­ætl­un­ar­innar fastur í hátt­virtri umhverf­is- og sam­göngu­nefnd eina ferð­ina enn, rétt um sex árum eftir að hann leit dags­ins ljós. Það er ástæða til að spyrja, frú for­seti: Hvað veld­ur?“ spurði hún í lok ræðu sinn­ar.