Tæp­lega helm­ingur íslenskra blaða- og frétta­manna segir að sér hafi verið ógnað eða hótað í starfi. Þetta er meðal nið­ur­staðna í nýlegri könnun rann­sókn­ar­hóps í verk­efn­inu Worlds of Journa­l­ism Study (WJS). Um 40 pró­sent svar­enda sögðu að þeim hefði stundum eða sjaldan verið ógnað og sjö pró­sent svar­enda sögðu að þeim hefði oft eða mjög oft verið ógn­að. Því hefur rétt rúm­lega helm­ing­ur, eða 53 pró­sent, blaða­manna aldrei verið ógnað eða hótað í starfi.

Fjallað er um rann­sókn­ar­verk­efni WJS í nýjasta hefti Blaða­manns­ins sem nú er í prent­un. Þar segir að í rann­sókn­ar­verk­efn­inu sé sjónum beint að örygg­is­málum og stefnt sé að því að bera saman stöð­una í hinum ýmsu löndum heims. Rann­sókn­ar­hópur lagði ítar­lega könnun fyrir íslenska blaða- og frétta­menn þar sem spurt var um hvers kyns ógnir sem steðja að íslenskum blaða­mönn­um. Nú hafa frum­nið­ur­stöður rann­sókn­irnar verið birtar sem byggja á íslenskum hluta henn­ar.

Einnig er nokkuð um það að sið­ferði blaða­manna sé dregið í efa en innan við 40 pró­sent svar­enda segja það aldrei hafa gerst á und­an­förnum fimm árum. Tæpur helm­ingur segir að sið­ferði við­kom­andi hafi verið dregið í efa sjaldan eða stundum og ell­efu pró­sent svar­enda segja það ger­ast oft eða mjög oft.

Ástandið sam­bæri­legt í nágranna­lönd­unum

„Aðrar teg­undir ógnar eða árása virð­ast ekki eins algeng­ar, en þó kemur það satt að segja á óvart hversu algengt ýmis konar ofbeldi er, s.s. að dreift sé um fólk per­sónu­upp­lýs­ingum eða að fólk sé beitt þving­unum í orðum eða gerð­um. Rétt er að hafa í huga að þær pró­sentur sem hér er miðað við eru reikn­aðar af heild­arsvörum 248 svar­enda, þannig að það að 13% hafi verið lög­sótt í starfi síð­ustu fimm ár þýðir í raun 32 ein­stak­ling­ar. Eins þýðir það að 12% hafi verið beitt kyn­ferð­is­legri áreitn­i/of­beldi að um er að ræða um 30 ein­stak­linga, og þar af er mik­ill meiri­hluti kon­ur,“ segir um nið­ur­stöð­urnar í grein­inni.

Frum­nið­ur­stöð­urnar eru sagðar benda til þess að ástandið í örygg­is­málum blaða­manna sé í eðli sínu nokkuð sam­bæri­legt við það sem ger­ist í lönd­unum í kringum okk­ur. Því sé full ástæða til að horfa til þess hvernig fjöl­miðla­fólk í lönd­unum í kringum okkur bregst við slíkum ógnum og draga af þeim lær­dóma.