Þorsteinn Már Baldvinsson forstjóri Samherja hefur lagt fram kæru hjá lögreglunni á höfuðborgarsvæðinu á hendur Jóhannesi Stefánssyni, fyrrverandi framkvæmdastjóra á vegum Samherja á Namibíu, sem lét Wikileaks í té gögn sem varða meintar mútugreiðslur og annað í rekstrinum í Namibíu.
Kæran er, samkvæmt yfirlýsingu á vef Samherja, fyrir rangar sakargiftir og „ýmis ummæli sem Jóhannes, eða fólk á hans vegum, hefur látið falla í fjölmiðlum og víðar að undanförnu“. Staðið hefur verið að fjársöfnun fyrir Jóhannes síðustu vikur, en söfnunin er á vegum erlendra félagasamtaka sem styðja við uppljóstrara.
Á GoFundMe-fjáröflunarsíðu hafa safnast rúmlega 3.600 evrur Jóhannesi til stuðnings, en takmarkið er að safna 75 þúsund evrum.
Fullyrt er á GoFundMe-síðunni að Jóhannes hafi verið fórnarlamb manndrápstilraunar er hann var staddur í Höfðaborg í Suður-Afríku árið 2017. Í frétt namibíska dagblaðsins The Namibian sem birtist 2. mars er haft eftir Jóhannesi að hann telji fyrrverandi vinnuveitendur sína hafa haft fulla vitneskju um tilræðið við sig.
Á vef Samherja segir að í kærunni komi fram að Jóhannes kunni að hafa með ummælum sínum í þessu viðtali og öðru viðtali reyndar líka „gefið í skyn að forstjóri Samherja hafi á einhvern hátt tengst meintri eitrun og meintum tilraunum til að nema hann á brott.“
Þess krafist að lögreglan rannsaki málið
„Þannig virðist Jóhannes vera að reyna að koma því til leiðar að forstjóri Samherja verði sakaður um þessi brot, þ.e. tilraun til manndráps og tilraun til frelsissviptingar eða einhvers konar hlutdeild eða tengsl við slík brot. Með þessu kunni Jóhannes að hafa gerst sekur um rangar sakargiftir í garð Þorsteins Más Baldvinssonar. Er þess krafist að lögreglurannsókn verði hafin, tekin verði skýrsla af Jóhannesi og gagna aflað frá Suður-Afrískum lögregluyfirvöldum. Þá er lögreglunni bent á það gæti talist eðlilegt að rannsaka í leiðinni hvort fjársvik hafi verið framin í tengslum við fjársöfnunina sem áður er getið,“ segir enn fremur á vef Samherja.
„Hingað til hef ég ekki brugðist sérstaklega við fullyrðingum og margvíslegum ásökunum Jóhannesar,“ er haft eftir Þorsteini Má á vef Samherja. Hann segir að hann geti hins vegar ekki lengur orða bundist því nú vilji Jóhannes að samstarfsmenn hans meina að hann eða samstarfsmenn han hafi gert tilraun til að ráða honum bana.
„Lengra verður ekki ekki gengið en að bera mönnum á brýn að ætla að ráða menn af dögum. Mér er gróflega misboðið og því er óhjákvæmilegt að spyrna við fótum. Þessu til viðbótar freistar Jóhannes þess nú að blekkja fólk til að leggja fé í söfnun undir þeim formerkjum að honum hafi verið sýnt banatilræði. Þetta er allt saman ósköp dapurlegt,“ er haft eftir forstjóra Samherja á vef fyrirtækisins.
