Veiði­gjöld munu lækka um 1,8 millj­arða króna á næsta ári. Þá er áætlað að þau verði um átta millj­arðar króna en þau skil­uðu um 9,8 millj­örðum króna í rík­is­kass­ann á þessu ári. Þetta kemur fram í fjár­laga­frum­varpi árs­ins 2015 sem kynnt var í gær­morg­un.

Rík­is­stjórn Sjálf­stæð­is­flokks og Fram­sókn­ar­flokks réðst í breyt­ingar á veiði­leyfagjöldum sum­arið 2013 með það fyrir sjónum að lækka það umtals­vert. Lækkun veiði­gjalda mun koma fyrst fram að fullu árið 2015.

Mik­ill hagn­aður í sjáv­ar­út­vegi

Stærstu sjáv­ar­út­vegs­fyr­ir­tæki lands­ins, sem greiða uppi­stöð­una af veiði­gjöld­un­um, hafa ekki upp­lifað neina sult­ar­tíma á und­an­förnum árum. Auknar mak­ríl­veiðar hafa þar skipt miklu máli. Fyr­ir­tækin sem veiða mak­ríl greiddu ekki sér­stak­lega fyrir þær afla­heim­ild­ir.

Í síð­ustu viku var til­kynnt um að Sam­herji, eitt stærsta sjáv­ar­út­vegs­fyr­ir­tæki Evr­ópu, hefði hagn­ast um 22 millj­arða króna á árinu á und­an. Hluti þess hagn­aðar er til­kom­inn vegna eign­ar­sölu og um helm­ingur af starf­semi fyr­ir­tæk­is­ins er erlend­is. Heild­ar­hagn­aður Sam­herja og dótt­ur­fé­laga á árunum 2011 til 2013 voru tæpir 47 millj­arðar króna.

Það hefur líka gengið ágæt­lega hjá HB Granda. Fyr­ir­tækið hagn­að­ist um 14,1 millj­arð króna á tíma­bil­inu 2011 til 2013. Útgerð­ar­fé­lagið Brim skil­aði sam­tals tæp­lega tíu millj­arða króna hagn­aði árin 2011 og 2012 og Ísfé­lag Vest­manna­eyja hagn­að­ist um 7,8 millj­arða króna á sama tveggja ára tíma­bili. Hvor­ugt fyr­ir­tækið hefur skilað inn árs­reikn­ingi fyrir árið 2013.