Fyrir rúmu ári síðan greindi Kjarninn frá því að rannsóknardómari í Lúxemborg hefði lokið rannsókn sinni á á Lindsor-málinu svokallaða og sent niðurstöður hennar til saksóknara, tæpum tólf árum eftir að hinn íslenski banki Kaupþing, sem er miðpunktur málsins, féll og atburðirnir sem málið snýst um áttu sér stað. Það gerði hann með formlegri ákvörðun sem dagsett var 24. júlí 2020.
Síðan þá hefur málið legið hjá saksóknaranum sem hefur nú í næstum 14 mánuði verið að leggja mat á niðurstöðuna til að komast að niðurstöðu um hvort senda eigi ákæru til dómstóla í Lúxemborg.
Kjarninn greindi frá því í fyrrasumar, og hafði eftir Dian Klein, talskonu dómsmálaráðuneytis Lúxemborgar, að aðstoðarsaksóknari sem ynni að málinu teldi afar líklegt að ákæra verði lögð fram gagnvart einhverjum þeirra grunuðu í málinu.
Samkvæmt upplýsingum frá dómsmálaráðuneyti Lúxemborgar sem fengust í síðustu viku er málið þó enn á sama stað. Saksóknarinn er að vinna í því. Í svari við fyrirspurn Kjarnans um málið segir Henri Eippers, annar talsmaður dómsmálaráðuneytisins, að hið mikla gagnamagn sem sé undir í málinu hafi leitt til þess að matsvinnan hafi tekið lengri tíma en búist var við. „Það verða líklega ekki neinar fregnir fyrir vorið 2022,“ segir Eippers í skriflegu svari.
Lán veitt sama dag og neyðarlánið
Lindsor-málið snýst um 171 milljónir evra lán sem Kaupþing veitti félagi sem heitir Lindsor Holding Corporation og er skráð til heimilis á Tortóla-eyju. Lánið var veitt 6. október 2008, sama dag og neyðarlög voru sett á Íslandi og Geir H. Haarde, þáverandi forsætisráðherra, bað guð að blessa Ísland. Þann dag lánaði Seðlabanki Íslands líka Kaupþingi 500 milljónir evra í neyðarlán.
Þegar Kaupþing féll þremur dögum eftir kaupin á bréfunum var ljóst að Lindsor gat ekki greitt lánið til baka, enda eina eign félagsins verðlitlu skuldabréfin sem félagið hafði keypt á yfirverði þremur dögum áður. Engar tryggingar voru veittar fyrir láninu og tap kröfuhafa Kaupþings vegna þess því umtalsvert. Þeir sem seldu bréfin losuðu sig hins vegar undan ábyrgðum og, ef grunsemdir rannsakenda eru réttar, tryggðu sér um leið mikinn ágóða.
Fjórir einstaklingar gætu verið ákærðir
Í fréttatilkynningu sem var send út frá saksóknarembættinu í Lúxemborg í ágúst í fyrra sagði að á meðan að rannsóknin stóð yfir hafi fimm einstaklingar haft stöðu grunaðra.
Fjórir af þeim verða ákærðir, samkvæmt niðurstöðu rannsóknarinnar, ef ákæra verður gefin út. Ekki er greint frá því um hvaða fjóra einstaklinga er að ræða.
Dómskerfið í Lúxemborg er ólíkt því sem Íslendingar eiga að venjast. Ákveði saksóknari að gefa út ákæru þá er hún send til svokallaðs „council chamber“ héraðsdómsstigs Lúxemborgar sem mun taka ákvörðun um hvort að málið fái efnismeðferð eða verði vísað frá. Sakborningar í málinu munu á þeim tímapunkti fá tækifæri til að setja fram varnir í málinu.
Þeir sem eru grunaðir um lögbrot í málinu, fyrrverandi helstu stjórnendur Kaupþings og vildarviðskiptavinur þeirra, hafa ávallt harðneitað að nokkuð saknæmt hafi átt sér stað í málinu.
