Í Reykja­nesbæ standa upp undir 2.000 íbúðir tóm­ar.Þær eru af ýmsum gerðum í ein- og fjöl­býli og eru sam­tals um helm­ingur af öllu auðu og íbúð­ar­hæfu hús­næði lands­ins. Ótaldar eru þó ófull­gerðar bygg­ingar á svæð­inu.

Eignir þessar standa land­fræði­lega á til­tölu­lega afmörk­uðu svæði. Hlut­falls­lega sam­svarar fjöldi þeirra því að tug­þús­undir íbúða stæðu tómar á höf­uð­borg­ar­svæð­inu mitt í æpandi hús­næðiseklu.

Þetta ástand hefur varað allt frá hruni, þegar loftið lak úr íslensku fast­eigna­bólunni. Við­brögð bæj­ar­yf­ir­valda hafa verið í skötu­líki, þó að fólk í hús­næð­is­hraki hafi fjölgað á tíma­bil­inu. Bæj­ar­yf­ir­völd hafa ekki umráða­vald yfir eign­un­um. Ástandið fær litla um­­fjöllun í fjöl­miðlum og umræðan á svæð­inu rétt fyrir kosn­ingar er jafn flatneskju­leg og flug­braut­irnar á vell­in­um.

Hag­fræð­ing­ar, sumir með Nóbels­gráðu, hafa dásamað íslensku leið­ina út úr efna­hags­hrun­inu. Þeir lenda í Kefla­vík, taka rút­una í bæinn og halda fyr­ir­lestra sína í Hörp­u­nni.

Yrðu nið­ur­stöður þeirra eins ef þeir stöldr­uðu aðeins lengur við í Kefla­vík? Færu í bíltúr einn eft­ir­mið­dag og teldu tómar íbúðir og ein­býl­is­hús? Kefla­vík er á sinn hátt svar Íslands við Detroit í Banda­ríkj­un­um. Borgin laðar að sér ljós­mynd­ara alls staðar að sem taka myndir af tómum hús­um. Í Kefla­vík eru hæg heima­tökin og yfrið nóg myndefni örstutt frá flug­vell­in­um. Hægt væri að selja ljós­mynda­ferðir um svæð­ið. Af nógu er að taka. Með­fylgj­andi myndir eru frá Styrmi Bark­ar­syni. Hann tók yfir 300 myndir á nokkrum dög­um. Þær voru að fjölda til aðeins topp­ur­inn á ísjak­an­um.

Leið­sögu­maður í ljós­mynda­leið­angrinum þarf að útskýra fyrir útlend­ingum hvernig standi á neyð­ar­á­standi á leigu­mark­aði þar sem þús­undir íbúða standa auð­ar. Svæðið er íslenska efna­hagsund­rið fyrir og eftir hrun í hnot­skurn. Þar er graf­hvelf­ing „Græða á dag­inn, grilla á kvöld­in“. Líkið af spari­sjóðnum og féhirð­in­um. Beina­grindin af raf­magns­lausa álver­inu. Múmían af inn­hverfri einka­væð­ingu. Og síð­ast en ekki síst: Upp undir tvö þús­und íbúðir sem lána­stofn­anir láta grotna niður heilu og hálfu ára­tug­ina. Barna­fjöl­skyldur á svæð­inu í hús­næð­is­hraki koma að luktum dyrum alls staðar í kerf­inu. Þau sem hafa misst hús­næði sitt og lent á van­skila­skrá eru læst út í kuld­an­um. Kerfið yppir öxl­um. Íslensk hús­næð­ispólítík eftir hrun.

Fengi svæðið efna­hags­legt heil­brigð­is­vott­orð frá Hörpu­hag­fræð­ing­un­um? Eða þarf að end­ur­skoða hag­fræð­ina?

Til að sjá fleiri myndir af tómum húsum í Reykja­nesbæ smelltu hér.

Greinin birt­ist fyrst í nýjasta Kjarn­an­um. Lestu hann hér.