Það eru ekki allir svo lánsamir að geta sleppt því að fylgj­ast með frétt­um, að standa ekki stuggur af gangi heims­mála og að fara frá degi til dags án þess að finn­ast póli­tík koma sér við. Til­vera margra okkar er nefni­lega hápóli­tísk og ákvarð­anir stjórn­mála­manna hafa drastísk áhrif á líf okkar og rétt­indi.

Þau sem fædd­ust í öðru landi velta vöngum yfir því hvenær komið er að þeim að vera send úr landi. Þau sem eru fötluð ótt­ast í óvissu um hvort hægt verði að fá hjálp­ar­tæki og aðstoð. Þau sem búa við fátækt hafa áhyggjur af því hvort stjórn­völd taki upp enn fjand­sam­legri stefnu gegn fátæku fólki. Þau sem upp­lifa kyn sitt annað en þeim var úthlutað við fæð­ingu velta því fyrir sér hvort áfram verði hægt að treysta á nauð­syn­lega heil­brigð­is­þjón­ustu.

Mörg okkar ótt­ast upp­gang hat­urs og ofbeldis og blóð­ugan nið­ur­skurð stjórn­valda eins og gerst hefur í mörgum löndum í kringum okk­ur.

Þing­manni nokkrum finnst „rétt­læt­is­ridd­ar­ar“, þau okkar sem berj­ast fyrir bættum heimi og auknum mann­rétt­ind­um, vera meiri ógn við lýð­ræðið en Don­ald Trump for­seti Banda­ríkj­anna. Maður sem rífur börn af for­eldrum sínum vegna þess að þau eru „ólög­leg“. Maður sem hefur stutt hópa sem ýta undir kyn­þátta­for­dóma, sem berj­ast gegn frelsi kvenna og hinsegin fólks. Maður sem skeytti því engu þó óeðli­leg afskipti hafi verið höfð af kosn­ing­unum sem komu honum í emb­ætti. Maður sem ítrekað hefur ráð­ist gegn frjálsri og fag­legri fjöl­miðl­un.

Að telja okkur sem brýnum raust okkar vera ógn við lýð­ræðið getur bara verið afstaða þeirra sem njóta for­rétt­inda í krafti efna­hags síns, húð­lit­ar, kyn­hneigðar og -gervis og lík­am­legrar getu. Þetta eru for­rétt­indi þeirra sem telja sig ekk­ert hafa að ótt­ast. Við hin vitum að það er Don­ald Trump sem er ógn við lýð­ræðið og allir hans fylg­is­menn og skoð­ana­bræður sem ýta undir hatur og ofbeldi.

Við höldum áfram að steita hnef­ann og krefj­ast þess að til­vera okk­ar, rétt­indi og þarfir séu teknar inn í mynd­ina við alla ákvarð­ana­töku. Þó ein­hver kunni að upp­nefna okkur og segja okkur ógn við lýð­ræðið þá höldum við áfram. Við höfum nefni­lega ekki frelsi til að vera sama.

Höf­undur er bar­áttu­kona fyrir rétt­indum fatl­aðs fólks og for­maður fram­kvæmda­stjórnar Sam­fylk­ing­ar­inn­ar.