Þann 5. júní 2018 var undirritaður málefnasamningur nýs meirihluta í Hafnarfirði. Samningurinn var undirritaður á Hörðuvöllum og var sú staðsetning á margan hátt táknræn fyrir áherslur núverandi meirihluta. Í baksýn má sjá leik- og grunnskóla, ásamt nýbyggðu hjúkrunarheimili sem brátt verður tekið í notkun. Áherslan er á fólkið; fjölskylduvænar áherslur eru rauði þráðurinn í þeim aðgerðum sem ráðist hefur verið í. Nú er ár liðið af kjörtímabilinu og þykir mér rétt, á þeim tímapunkti, að líta yfir farinn veg.
Systkinaafsláttur aukinn til muna og nýjum komið á
Leikskólagjöldum var haldið óbreyttum sjötta árið í röð, en systkinaafsláttur af leikskólagjöldum var aukinn til muna. Afsláttur fyrir annað systkini fór úr 50% í 75% og þriðja systkini fór úr 75% í 100%. Tekjutengdur afsláttur leikskólagjalda var jafnframt aukinn. Einnig var komið á nýjum systkinaafslætti á fæðisgjöldum nemenda í grunnskóla. Fyrsta skrefið var; þriðja systkini fær frítt. Með þessum aðgerðum viljum við létta þeim róðurinn sem þyngstar byrðar bera.
Ógnvænlegar tölur frá UNICEF kalla á auknar áherslur á málefni barna
Í bréfi UNICEF til bæjarráðs kemur fram, samkvæmt nýrri tölfræði sem UNICEF á Íslandi fékk Rannsóknir & greiningu til að vinna fyrir sig, að tæplega 1 af hverjum 5 börnum hér á landi (16,4%) hefur orðið fyrir líkamlegu og/eða kynferðislegu ofbeldi fyrir 18 ára afmælisdaginn sinn. Þar er ekki meðtalin vanræksla, andlegt ofbeldi, rafrænt ofbeldi eða einelti, en þá væri þessi tala mun hærri. Hér skipta viðbrögð sveitarfélaga miklu máli og við höfum í Hafnarfirði svo sannarlega tekið þessi mál föstum tökum, en betur má ef duga skal.
Nýtt stjórnskipulag hjá Hafnarfjarðarbæ tekur gildi 1. september 2019, þar sem nýtt svið þjónustu og þróunar tekur til starfa og áherslubreytingar verða á ýmsum öðrum sviðum bæjarfélagsins. Fjölskylduþjónustu verður til að mynda fjölskyldu- og barnamálasvið, þar sem sérstök áhersla verður á málefni barna. Nýverið samþykkti bæjarstjórn að hefja innleiðingarferli á Barnasáttmála Sameinuðu þjóðanna í stjórnsýslu og starfsemi bæjarfélagsins. Þetta, og margt annað, hefur það í för með sér að við í pólitíkinni og starfsmenn bæjarfélagsins þurfa stöðugt að setja upp „barnaréttindagleraugun“ þegar ákvarðanir eru teknar.
Jafnframt er ánægjulegt að benda á að í gegnum nýundirritaðan samning, milli Hafnarfjarðarbæjar og ÍBH, er formleg samþykkt um stofnun óháðs fagráðs sérfræðinga í Hafnarfirði sem tekur á ágreinings- og álitamálum frá íþróttafélögum varðandi mál sem tengjast ofbeldi, þar á meðal kynferðislegu ofbeldi og eineltismálum.
Áfram veginn
Ég vil því segja að við höfum verið að stíga mjög stór og afgerandi skref í átt að barnvænna og öruggara samfélagi fyrir börnin okkar. Þau eru það dýrmætasta sem við eigum. Við munum halda áfram að tala fyrir slíkum áherslum og betra samfélagi næstu árin.
Höfundur formaður bæjarráðs í Hafnarfirði.
