Hér er fjallað um ólík viðhorf, átök og sleggjudóma um aðferðafræði til þess að viðhalda heilsu og lækna sjúkdóma.
Því er haldið fram í nýlegri umfjöllun, að virtir læknar vestanhafs séu kuklarar og hafi engin rök. Í öðru tilviki var því haldið fram, að verið væri að féfletta sjúkling. Þó byggist hvort tveggja á rannsóknum Nóbelsverðlaunahafa. Einnig virðast aðrir andmælendur ekki hafa gert sér grein fyrir niðurstöðum rannsókna á því orkuflæði, sem á sér stað í mannslíkamanum og afleiðingum truflana á því flæði.
Gunnar Rafn Jónsson, læknir
Viðhorf hvers og eins til allra hluta, viðburða, einstaklinga og hugmynda eru ólík. Læknisfræðin og heilbrigðisvísindin í heild sinni hafa ekki farið varhluta af því. Okkur ber skylda til þess að leita sannleikans, horfast í augu við þann árangur, sem hver meðferð hefur í för með sér. Þó svo margt hafi áunnist, vitum við harla lítið um það mikla meistaraverk, sem mannslíkaminn er. Því er ekki við hæfi að umgangast viðhorf annarra, sem ekki passa inn í innrætta þekkingarmynd með lítilsvirðingu og hroka.
Margt í nútíma þjóðfélagi hefur leitt til samþjöppunar valds, framleiðslu, þöggunar og kúgunar hinna minni. Peningaöfl, lyfjarisar, stór matvælafyrirtæki, vissir aðilar innan heilbrigðisgeirans og fjölmiðla hérlendis sem erlendis reyna markvisst nú sem fyrr að gera lítið úr þeim, sem hafa sjálfstæðar skoðanir. Viðhorf þeirra, sem vilja kanna náttúruleg form lækninga og beita æskilegum forvörnum, eru vanvirt. Sérkennilegt er, hve erfitt reynist að afla styrkja til rannsókna á náttúrulegum leiðum til lækninga, forvarna og íhlutunaraðgerða, þó svo miljörðum hafi verið varið í áratuga rannsóknir á meðhöndlun krabbameins, offitu og annarra langvinnra sjúkdóma.
Hvers vegna gerist þetta? Vilja menn leiða hugann að því, hverjir hafa hag af því að halda okkur sjúkum, meðfærilegum, áhrifagjörnum þiggjendum heilbrigðisþjónustu? Mögulegar ástæður gætu verið hagsmunaárekstrar, innræting, græðgi, áhersla á ego-ið, fáviska, blekkingar eða mútur.
Oft virka einfaldar náttúrulegar leiðir jafn vel og stundum betur en þær rándýru leiðir, sem oft eru notaðar. Orkulæknar, græðarar, heilarar og aðrir, sem leggja sig fram um að bæta líðan skjólstæðinga sinna eiga ekki að þurfa að verða fyrir sleggjudómum fyrir það eitt að hafa annað viðhorf til heilbrigði og aðferða til lækninga – kjósa þá aðferð að upplýsa um þær aðferðir, sem í boði eru og leyfa síðan skjólstæðingnum að geta valið.
Vísindabyltingin gjörbreytti heimsmynd Vesturlanda á 16. og 17. öld. Ætlunarverk Newtons var að skynja öll lögmál heimsins, útskýra þau á máli stærðfræðinnar og forma þannig heildrænt kerfi. Sumir nútíma snillingar vilja ýmist splæsa nýjum og góðum genum í stað þeirra veikluðu, en aðrir koma fram með heildarlausnir um tengingu alls sem er, hvort sem um er að ræða hin eðlisfræðilegu lögmál, vitund eða tilfinningar, vilja heildrænar lækningar, stóla á ábyrgð einstaklinga á eigin heilsu og velferð samfélagsins.
Margar hugmyndir vísindaheimsins varðandi líf- og læknisfræði hrundu eins og spilaborg fyrir um 15 árum síðan, þegar erfðalykillinn var ráðinn. Þar sem við höfum ekki nema tæplega 24.000 gen, urðu menn að finna aðrar skýringar á margbreytileika mannslíkamans. Ný fræðigrein varð til, yfirgenaerfðafræðin (epigenetics). Rannsóknir á vitundinni og innan yfirgenaerfðafræði hafa fært okkur nýja sýn, ný viðhorf til heilsu og sjúkdóma.
- Bænir og fyrirbænir hafa tvímælalaust mikil áhrif til góðs
- Íhugun, einbeiting, gjörhygli í yfir 30 þekktum kerfum skila árangri
- Jákvæðni, heilbrigður lífsstíll, samheldni, góð samskipti sömuleiðis
- Skortur á snefilefnum og vítamínum, streita, fátækt, hefur gagnstæð áhrif
Fjöldi rannsókna sýndi, að ótti, áhyggjur, tilfinningar, streita, umhverfisþættir, matur, trú okkar, bænir og annað þess háttar kæmi boðum yfir til erfðaefnisins. Vísindamenn sáu þannig í tilraunum, að umhverfið gat umbreytt úrlestri erfðaefnisins.
Tími þöggunar er liðinn. Veraldarvefurinn hefur fært almenningi vísindagreinar og möguleika til þess að nálgast viðhorf, sem peningavaldinu hugnast lítt.
Fjölmiðlar eiga að fjalla óhindrað um slík mál óháðir hagsmunum eigenda, persónulegri innrætingu eða markvissri niðurlægingu á viðhorfum annarra.
Það er hlutverk aðila í heilbrigðisþjónustu, sem og annarri þjónustu í þágu almennings hvar sem er í heiminum að hlusta, meta og þjóna skjólstæðingum í hvívetna. Leiðarljós þeirra sé þekkingarleit, víðsýni, sannleiksást, rætt opinskátt og fordómalaust um málefnin.
Kærleikur, víðsýni, samkennd, virðing, persónuleg og samfélagsleg ábyrgð eru hluti af þeim gildum, sem sérhverjum ber að virða.
Vitundarvakning er hafin. Almenningur vill vera upplýstur. Almenningur vill eiga val, en þá verður frelsi að ríkja, en ekki kúgun.
